सभामुख पदको निर्वाचनका लागि दुई प्रस्ताव प्रस्तुत

साझापाना २०७९ माघ ५ गते १४:०४ मा प्रकाशित

काठमाडौँ । प्रतिनिधिसभा बैठकमा सभामुख पदको निर्वाचनका लागि दुई प्रस्ताव प्रस्तुत भएको छ ।

बैठकमा नेकपा (एमाले)का नेता सुवास नेम्वाङले सत्ता गठबन्धनका तर्फबाट उम्मेदवार रहनुभएका देवराज घिमिरेलाई सभामुख पदमा निर्वाचित गरियोस् भनी प्रस्ताव प्रस्तुत गर्नुभयो ।

नेता नेम्वाङले संसद्मा निष्पक्ष रुपमा भूमिका निर्वाह सक्नुहुन्छ भन्ने विश्वासका साथ सत्ता गठबन्धनका तर्फबाट घिमिरेलाई सभामुख पदको उम्मेदवार बनाएको बताउनुभयो ।

उक्त प्रस्तावमा नेकपा (माओवादी केन्द्र)का संसदीय दलका प्रमुख सचेतक हितराज पाण्डे र राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देन एवं राष्ट्रिय स्वतन्त्र पार्टी (रास्वपा)का अध्यक्ष रवि लामिछानेले समर्थन जनाउनुभएको थियो ।

यस्तै विपक्षी गठबन्धनका तर्फबाट कांग्रेस महामन्त्री विश्वप्रकाश शर्माले ईश्वरीदेवी न्यौपानेलाई सभामुख पदमा निर्वाचित गरियोस् भनी प्रस्ताव प्रस्तुत गर्नुभयो ।

महामन्त्री शर्माले न्यौपानेलाई सक्षम, योग्य र अनुभवका आधारमा सभामुख पदको उम्मेदवार बनाएको भन्दै शक्ति सन्तुलनका दृष्टिले पनि संसद्को सबैभन्दा ठूलो दल कांग्रेसका उम्मेदवार न्यौपानेलाई मतदान गर्न सबैलाई आग्रह गर्नुभयो ।

महामन्त्री शर्माको प्रस्तावमा नेकपा (एकिकृत समाजवादी)का नेता प्रकाश ज्वालाले समर्थन जनाउनुभएको छ ।

दुवै प्रस्तावमाथि केही बेरमा मतदान प्रक्रिया अघि बढाइ सभामुख चयन गरिने कार्यक्रम रहेको छ ।

क्याटेगोरी : समाचार
ट्याग : #प्रतिनिधिसभा बैठक, #सभामुख