सिथी नखःमा गरियो पानिको मुहान सरसफाई (फोटो फिचर)

साझापाना २०८१ जेठ ३० गते १४:१४ मा प्रकाशित

काठमाडौं, जेठ ३० गते । नेवाः (नेवार) जातिका विभिन्न चाडपर्वमध्ये सिथी नखः भिन्न तरिकाले मनाइन्छ । नेवाः जातिका हरेक चाडपर्वमा भोज खाने, मन्दिर गएर पूजा गर्ने चलनभन्दा पृथक रूपमा यो पर्व मनाइन्छ ।

आज (बुधबार) पानीका स्रोतहरूको सरसफाई गर्दै विभिन्न परिकारको भोजन गरेर मनाउने चलन छ । नेवाः जातिले यस पर्वको दिन इनार, ढुङ्गेधारा, कुवा, पोखरी सफा गर्ने गर्छन् । यसरी आफ्ना टोलका मानिसहरु मिलेर नजिकै रहेका इनार, ढुङ्गेधारा, कुवा, पोखरी सफा गर्ने गर्छन् ।

लामो समयदेखिको सुख्खायाम भएकाले यसबेला पानीको सतह पूरै घट्ने गर्छ । सिथी नखःका दिन मुहान सफा गयो भने वर्षभरि पानीको अभाव हुँदैन भन्ने जनविश्वास रहेको संस्कृतिविदको भनाइ छ ।काठमाडौँ उपत्यकाका नेवार समूदायले सिथि नखः मनाएका छन् ।

सिथी नखःको दिन सफा गरेको इनार, ढुङ्गेधारा र कुवाको पानी भने चार दिनसम्म प्रयोग गर्न नहुने परम्परा रहेको छ । पानीको मुहान सफा गरेपछि पानी जम्न समय लाग्नुका साथै फोहोर हुने भएकाले चार दिनपछि मात्रै चलाउने गरिन्छ । सिथि नखः पर्वले मनसुन सुरू हुन लागेको सङ्केत गर्ने गर्दछ ।