टोखामा सडक सुरक्षा र आपत्कालीन व्यवस्थापन प्रभावकारी बनाउन सम्झौता

साझा पाना २०८३ भदौ १८ गते १८:४४ मा प्रकाशित

काठमाडौं — टोखा नगरपालिकाले नगर क्षेत्रको सुरक्षा व्यवस्था थप प्रभावकारी बनाउन अत्याधुनिक सीसीटीभी क्यामेरा प्रणाली जडान तथा सञ्चालन गर्ने भएको छ।

टोखा नगरपालिका र काठमाडौं उपत्यका प्रहरी कार्यालय, रानीपोखरीबीच भएको सम्झौताअनुसार नगरपालिकाभित्र पहिचान गरिएका मुख्य–मुख्य सडक तथा चोकमा नेपाल प्रहरीले तोकेको मापदण्डअनुसार अत्याधुनिक सीसीटीभी प्रणाली जडान गरिने भएको हो।

सम्झौतामा PTZ (Pan Tilt Zoom), FLX, Face Recognition तथा ANPR (Automatic Number Plate Recognition) लगायतका प्रविधि प्रयोग गरी सीसीटीभी प्रणाली जडान तथा सञ्चालन गर्ने उल्लेख छ। यसका लागि टोखा नगरपालिकाले ‘टोखा नगर सुरक्षा कार्यक्रम’ अन्तर्गत ४ करोड रुपैयाँसम्मको बजेट उपलब्ध गराउने जनाएको छ।

नगरपालिकाका अनुसार सीसीटीभी प्रणालीको खरिद तथा जडानसम्बन्धी सम्पूर्ण प्रक्रिया सार्वजनिक खरिद कानूनबमोजिम प्रहरी कार्यालयले गर्नेछ। प्रणाली सञ्चालन तथा मर्मत–सम्भारका लागि आवश्यक प्राविधिक जनशक्ति र समितिसम्बन्धी व्यवस्था पनि गरिनेछ।

सम्झौताअनुसार जडान हुने सीसीटीभी प्रणालीलाई काठमाडौं उपत्यका प्रहरी कार्यालयको सुरक्षा निगरानी तथा नियन्त्रण कक्षसँग आबद्ध गरिनेछ। साथै, यसअघि नगरपालिकाभित्र जडान भई सञ्चालनमा रहेका सीसीटीभी प्रणालीलाई समेत सम्झौताअनुसार नयाँ प्रणालीमा आबद्ध गर्दै लैजाने उल्लेख छ।

टोखा नगरपालिकाले आधुनिक प्रविधिको प्रयोगबाट अपराध नियन्त्रण, सडक सुरक्षा, आपत्कालीन व्यवस्थापन तथा समग्र सार्वजनिक सुरक्षामा थप प्रभावकारिता आउने विश्वास व्यक्त गरेको छ। नगरपालिकाले सुरक्षित र समृद्ध टोखा निर्माणका लागि प्रहरी, जनप्रतिनिधि, नागरिक समाज तथा नगरवासीबीच सहकार्य आवश्यक रहेको जनाएको छ।

क्याटेगोरी : समाचार
ट्याग : #टोखामा सडक सुरक्षा र आपत्कालीन व्यवस्थापन प्रभावकारी बनाउन सम्झौता