खाँदबारी (संखुवासभा), १४ फागुन । संखुवासभामा रहेको मकालु हिमाल आरोहणको ७० वर्ष पुरा भएको अवशरमा मकालु गाउँपालिकाले बुधबारबाट मकालु महोत्सव आयोजना गरेको छ । मकालु गाउँपालिकाको केन्द्र नुमबजारमा आयोजित कार्यक्रममा जिल्लामा भएका जातजातिका झाँकी प्रदर्शन गरिएको थियो । झाँकीले नुमको बिभिन्न स्थानको परिक्रमा गरेको थियो । भाषा आयोगका सदस्य डा पुस्करदेब भट्ट, कोशी प्रदेशका पूर्वमन्त्री तथा संखुवासभाका प्रदेश सांसद राजेन्द कार्की र मकालु गाउँपालिकाका अध्यक्ष वाङदी शेर्पाले पानसमा बत्तिबालेर महोत्सवको उदघाटन गर्नुभएको थियो ।

विश्वको पाँचौ अग्लो हिमाल मकालु ८ हजार ४ सय ६३ मिटर उचाईमा छ । मकालु हिमालको शिखरमा मानव पाइला टेकेको ७० वर्ष पुरा भएको गाउँपालिका अध्यक्ष शेर्पाले बताउनुभयो । सन् १९५५ को मे १५ मा जिन फ्रान्को नेतृत्वको ‘फ्रान्स स्प्रिङ १०५५’ नामक आरोहण दलबाट जिन कोजी र लियोनर टेरी पहिलो पटक मकालुको शिखरमा पुगेको शेर्पाले बताउनुभयो । मकालु हिमालको पश्चिम मोहडाबाट शिखर चुम्न सफल दुवै आरोही जीवित छैनन् । सर्वोच्च शिखर सगरमाथामा चुमेको ठिक दुई वर्षपछि मकालु हिमालको आरोहण सफल भएको अध्यक्ष शेर्पाले बताउनुभयो।

मकालु महोत्सवको अवशरमा दक्षिण एसियाली साहित्यिक साँस्कृतिक सम्मेलन पनि उदघाटन गरिएको छ । बुधबारबाट सुरु भएको महोत्सव र सम्मेलन फागुन १७ सम्म चल्ने छ । दक्षिण एसियाका विभिन्न मुलुकबाट साहित्यकार र कलाकारहरुको उपस्थिति भएका छन् । उनीहरुले आ-आफनो देशको भाषा संस्कृति पनि पदर्शन गरेका छन् ।

मकालु महोत्सवले धार्मिक तथा पर्यटकीय क्षेत्रको प्रचारप्रसारमा सहयोग पुग्ने अपेक्षा गरिएको अध्यक्ष शेर्पाको भनाई छ । महोत्सवले मकालुको मात्र नभई संखुवासभाको पर्यटन, सांस्कृतिक साथै साहित्यिक क्षेत्रमा टेवा पुग्ने उहाँले बताउनुभयो । दक्षिण एसियाली सम्मेलनको संयोजन मकालु साहित्य समाजले गरेको हो । महोत्सवका अवसरमा गाउँपालिकालाई विभिन्न क्षेत्रबाट योगदान गर्नेहरुलाई सम्मान गरिएको छ ।

क्याटेगोरी : समाचार
ट्याग : #hot, #मकालु गाउँपालिका, #संखुवासभा

---

---

---