विश्वशान्तिको कामना गर्दै खांदबारीमा आयुअभिषेक पुजा सम्पन्न- (तस्बिरहरु )

साझापाना २०८० चैत्र २५ गते ०८:०५ मा प्रकाशित

खांदबारी — पुर्वको हिमाली जिल्ला संखुवासभाको खांदबारीमा विश्वशान्तिको कामना गर्दै दुई दिने विश्वशान्ति तथा आयुसाधना आराधना पूजा शनिबार सम्पन्न भएको छ । संखुवासभाका बौद्ध धर्मालम्बीका ८ वटा संस्थाहरुको संयुक्त आयोजनामा पूजाको आयोजना गरिएको थियो ।

विश्वमा भइरहेको हिंसात्मक गतिविधिहरुको अन्त्य गर्न र आममानिसहरु शारीरिक तथा मानसिक रुपमा समेत स्वस्थ रहन विश्व शान्तिको कामना गर्दै पूजा आयोजना गरिएको मुख्य आयोजक तथा पहलकर्ता हेल्पिङ हेण्ड्स हेल्थ एण्ड एजुकेसनका संस्थापक वरिष्ठ समाजसेवी नारायण श्रेष्ठले बताउनुभयो ।

पूजामा परम पावन लामा रानग रिन्छेन रिन्पोछे गुरु सहित लुम्बिनीबाट ६ जना मुख्य लामागुरुको उपस्थिती छ । पुजा सुरु हुन अघि लामा गुरुहरुलाई शुक्रबार बाजागााजा सहित खांदबारीको नयांबजार हुंदै नगरको बिभिन्न भाग परिक्रमा गराइएको थियो । हिमाली जिल्ला डोल्पामा पुनर्जन्म हुनुभएको डोल्पोबुद्ध परम पावन लामा रानाग रिन्छेन रिन्पोछेबाट धर्म–देसना स्वरूप चावासुम (लामा–यिदाम–खाण्डोमा अर्थात लामा, इष्टदेव तथा डाकिनी) त्रित्नमूल गुरूहरूको संयुक्त रुप अतियोग महा–रत्न गणचक्रका पवित्र दुई दिवसीय विस्तृत पुजाको आयोजना गरिएको हो ।