उपकुलपतिको कार्यालयमा लागेको ताला तत्काल खोल्न एमालेको माग

साझापाना २०७९ भदौ १७ गते १६:४४ मा प्रकाशित

काठमाडौं । नेकपा एमालेले त्रिभुवन विश्वविद्यालय उपकुलपतिको कार्यालयमा लागेको तालाबन्दी तत्काल खोल्न सरकारसँग माग गरेको छ ।

आज बसेको प्रतिनिधिसभाको बैठकमा एमालेका सांसद पदम गिरीले विशेष समय लिएर सत्ताधारी दलका विद्यार्थी सङ्गठनले लगाएको ताला तत्काल खोल्न माग गरेका हुन् । उपकुलपतिको कार्यालय बन्द हुँदा विश्वविद्यालय र विद्यार्थी दुवैलाई असर परेको भन्दै सांसद गिरीले सरकारको आलोचना समेत गरेका छन् ।

‘तालाबन्दीले विश्वविद्यालय र विद्यार्थी दुवैलाई फाइदा पुगेको छैन,’ सांसद गिरीले भने, ‘यही भदौ ८ गते उपकुलपतिको कार्यकक्ष नै तोडफोड गरियो, भदौ १० गते विश्वविद्यालयको सामग्री र माइन्युट खोसिएको छ, त्यो शिक्षामन्त्रीले बुझ्नुभएको पाइएको छ, त्यो शिक्षामन्त्रीले बुझ्न पाउने हो कि होइन,’ उनले प्रश्न गरेका छन् ।

नेपाली काङ्ग्रेसका सभापति एवम् प्रधानमन्त्री शेरबहादुर देउवा स्वम् त्रिविको कुलपति हुनु र उनकै पार्टीसम्बद्ध विद्यार्थी सङ्गठनले विश्वविद्यालयका पदाधिकारीहरूलाई कुट्ने र मार्नेसम्मको धम्की दिँदै विश्वविद्यालय महिनौँदेखि बन्द गरिनु साह्रै लज्जाको विषय भएको सांसद गिरीको भनाइ छ ।

क्याटेगोरी : समाचार
ट्याग : #त्रिभुवन विश्वविद्यालय, #पदम गिरी