काठमाडौँ । त्रिभुवन विश्वविद्यालयको व्यवस्थापन सङ्कायअन्तर्गत बीबीए छैठौं सेमेस्टरको ‘अर्गनाइजेसनल विहेवियर’ विषयको परीक्षा साउन १ गते पुनः हुने भएको छ ।

गत असार २२ भएको परीक्षामा प्रिबोर्डको प्रश्नपत्र हुबहु सारिएपछि रद्द गरिएको थियो ।

यसै शैक्षिक सत्रमा मोडर्न नेपाल कलेज सोह्रखुट्टेको प्रि–बोर्डमा सोधिएको प्रश्नपत्रहरु हुबहु नक्कल भएपछि विद्यार्थीहरुले चर्को विरोध गरेका थिए ।

त्रिविले भने ति प्रश्नपत्रहरु परीक्षा सकिएपछि मात्रै डीन कार्यालयमा प्राप्त भएको जनाएको छ ।

त्रिभुवन विश्वविद्यालय, व्यवस्थापन सङ्कायअन्तर्गत सञ्चालित परीक्षाका विभिन्न विषयहरुको प्रश्नपत्रहरुको सम्बन्धमा विवाद उत्पन्न भएपछि त्रिवि कार्यकारी परिषदले छानविन समिति गठन गरेको थियो ।

समितिले दिएको प्रतिवेदनअनुसार यसअघि लिइएको परीक्षा रद्द गरी साउन १ गते सञ्चालन गर्न त्रिवि कार्यकारी परिषदको २७ गतेको बैठकले निर्णय गरेको हो ।

साथै प्रश्न निर्माण गर्ने शिक्षकलाई ३ वर्षसम्म डीन कार्यालयका परीक्षासँग सम्बन्धित कुनै पनि कार्यमा संलग्न नगराउने भनी गरिएको निर्णयलाई परिषदले अनुमोदन गरेको छ ।

क्याटेगोरी : समाचार
ट्याग : #breaking, #त्रिभुवन विश्वविद्यालय, #प्रिबोर्डको प्रश्नपत्र हुबहु, #हुबहु प्रश्नपत्रमा संलग्न शिक्षकहरुलाई ३ वर्षसम्म बन्देज

---

---

---