प्रहरी महानिरीक्षक (आइजिपी) नियुक्तिविरुद्धको रिटमा सुनुवाइ जारी

साझापाना २०७९ असार ५ गते १६:३६ मा प्रकाशित

काठमाडौँ । नेपाल प्रहरीको प्रहरी महानिरीक्षक (आइजिपी) नियुक्तिविरुद्धको रिटमा सुनुवाइ जारी छ ।

सर्वोच्चका कायममुकायम प्रधानन्यायाधीश दीपक कुमार कार्की र न्यायाधीश कुमार चुडालको इजलासमा भइरहेको बहसमा रिट निवेदक पक्षका कानुन व्यवसायीहरूले बहस गरिरहनुभएको छ ।

कामु प्रधानन्यायाधीश कार्की र न्यायाधीश चुडालको जेठ ३० गते बसेको इजलासले सो मुद्दा आजका लागि हेर्दाहेर्दैमा राख्ने आदेश दिएको थियो ।

वैशाख १८ गते मन्त्रिपरिषद्ले धिरजप्रताप सिंहलाई आइजिपी नियुक्त गर्ने निर्णय गरेपछि वरिष्ठता मिचेर मन्त्रिपरिषद्ले सिंहलाई आइजिपी नियुक्त गरेको भन्दै प्रतिस्पर्धी एआईजी विश्वराज पोखरेलले सर्वोच्चमा रिट दायर गर्नुभएको थियो ।

एआईजी बढुवाविरुद्ध पूर्व डिआइजी ईश्वरबावु कार्की, घनश्याम अर्याल र प्रकाशजंग कार्कीले दायर गरेको रिटपनि आइजिपी विरुद्धको रिटसँगै लगाउनमा राखेर एकसाथ सुनुवाइ भइरहेको छ ।

अहिलेका आइजिपी धीरज प्रताप सिंह र रवीन्द्र बहादुर धानुकलाई वरीयता मिचेर बढुवा गरेको भन्दै घनश्याम अर्याल सहित ३ जना डिआइजीले छुट्टाछुट्टै रिट दायर गर्नुभएको थियो ।

वैशाख १८ गते मन्त्रिपरिषद्ले सिंहलाई प्रहरी महानिरीक्षक नियुक्त गर्ने निर्णय गरेपछि आइजिपी सिंहले वैशाख १९ गतेदेखि नै कार्यभार सम्हाल्दै आउनुभएको छ ।

क्याटेगोरी : अपराध/सुरक्षा, समाचार
ट्याग : #धिरजप्रताप सिंह, #नेपाल प्रहरी