संखुवासभाको मादी नगरपालिकाले बस दुर्घटनामा मृत्यु भएका मृतकका परिवारलाई जनही एक लाख दिने

साझापाना २०७८ फागुन ३० गते १८:५० मा प्रकाशित

संखुवासभा – संखुवासभाको मादी नगरपालिकाले बस दुर्घटनामा मृत्यु भएका १५ जनाको परिवारलाई जनही एक लाख रुपैयाँ दिने भएको छ । मादी नगरपालिकाको सोमबार बसेको कार्यपालिकाको बैठकले मृतकका परिवारलाई जनही एक लाख दिने निर्णय गरेको नगर प्रमुख विदुरकुमार लिंथेपले बताउनुभयो । यस्तै बैठकले घाइतेहरूलाई उपचार खर्च जनही ५० हजार समेत दिने उहाँले बताउनुभयो ।
गत बिहीबार बिहान मादी ६ स्थित सात घुम्तीमा बस दुर्घटना हुँदा १५ जनाको मृत्यु भएको थियो । दुर्घटनामा चार जना घाइते समेत भएका थिए । मृतक र घाइतेको सम्झनामा भुमेश्वर महादेवको स्मारक समेत बनाउने निर्णय पनि गरिएको छ । स्मारकमा घाइते र मृतकको नाम लेखिने छ । मादीको ओखरबोटे बजारबाट झापाको दमकतर्फ जाँदै गरेको बा ४ ख ७३५ नम्बरको बस मादी नगरपालिका ६ को पुलुङस्थित सात घुम्तीमा दुर्घटना भएको थियो ।