नेपाः भाषा संरक्षणमा सूचना प्रविधिको उपयोग गर्न महानगरप्रमुख महर्जनको आग्रह

साझा पाना २०८२ मंसीर १३ गते १४:५९ मा प्रकाशित

ललितपुर महानगरपालिका प्रमुख चिरीबाबु महर्जनले नेपाः भाषा सूचना प्रविधिको उपयोग गर्दै भाषा संरक्षणमा लाग्न आग्रह गर्नुभएको छ।

भाषा संरक्षणमा महानगर आवश्यक सहयोग, समन्वय र सहकार्य गर्न तयार रहेको बताउनुभयो ।

मंका खलःका अध्यक्ष महेन्द्रलाल महर्जनले आजभोलि नेपाः भाषाको प्रयोग कम भएकाले समस्यामा पर्दै गएकाले आफ्नोे परिवारबाट नै यसको प्रयोगलाई प्राथमिकता दिनुपर्ने आवश्यकता औँल्याउनुभयो ।

अध्यक्ष महर्जनले लोकसेवा आयोगको परीक्षामा समेत नेवारी भाषालाई समावेश गराउनका लागि मंका खलले प्रयास गर्ने र यसका लागि महानगरलगायत सबै सरोकारको सहयोग आवश्यक रहेको बताउनुभयो ।

महानगर उपप्रमुख मञ्जली शाक्य बज्राचार्यले नेपाः भाषा मंका खलःले नेवारी भाषाको संरक्षणका लागि महत्त्वपूर्ण भूमिका निर्वाह गर्ने विश्वास व्यक्त गर्नुभयो ।

उहाँले भाषा र संस्कृति संरक्षणका लागि महानगरले स्थानीय पाठ्यक्रम लागू गरेको जानकारी गराउँदै नेवारी भाषा नै लोप हुने अवस्थामा पुगेकाले भाषा र लिपिको संरक्षणमा लाग्नुपर्ने बताउनुभयो । देशविदेशमा रहेका नेवारी समुदायका मानिसलाई एकताबद्ध गर्नु आवश्यक रहेको उपप्रमुख बज्राचार्यको भनाइ थियो ।

क्याटेगोरी : banner, समाज
ट्याग : #चिरीबाबु ललितपुर