सेभेन हर्स कन्सलटेन्सी क्लबले जित्यो प्रथम मातातिर्थ इन्डोर क्रिकेट प्रतियोगिता

साझा पाना २०८२ असार ९ गते ०९:२६ मा प्रकाशित

कपिल अधिकारी

चन्द्रागिरि — १६ टोलीको सहभागिता रहेको प्रथम मातातिर्थ इन्डोर क्रिकेट प्रतियोगिताको उपाधि सेभेन हर्स कन्सलटेन्सी क्लबले जितेको छ।

शनिबार चन्द्रागिरि नगरपालिका–०७ स्थित महांकालस्थानको गणेशमान सिंह स्मृति फुटसलमा सम्पन्न फाइनल खेलमा सेभेन हर्सले मिक्समाण्डु क्लबलाई पराजित गर्दै च्याम्पियन बन्न सफल भएको हो।

फाइनल खेलमा मिक्समाण्डुले दिएको ३४ रनको लक्ष्य सेभेन हर्सले २ विकेटको क्षतिमा सजिलै पूरा गर्दै उपाधि उचालेको हो।

प्रतियोगिता जितेसँगै सेभेन हर्स कन्सलटेन्सी क्लबले नगद ७० हजार रुपैयाँसहित शिल्ड, मेडल र प्रमाणपत्र प्राप्त गर्यो भने उपविजेता मिक्समाण्डुले ३० हजार रुपैयाँमा चित्त बुझायो।

असार ४ गतेदेखि सुरु भएको १० ओभरको यस प्रतियोगितामा सेभेन हर्सका दिनेश विष्ट (डेभिड) उत्कृष्ट ब्याट्सम्यान घोषित भए भने सोही टोलीका निरज भट्ट उत्कृष्ट बलर चुनिए।

मातातिर्थ क्रिकेट क्लबको आयोजनामा सम्पन्न प्रतियोगिताका विजेता तथा उपविजेतालाई चन्द्रागिरि नगरका मेयर घनश्याम गिरी, वडा नं. ७ का कार्यवाहक वडाध्यक्ष भुवन कुमार केसी, वडा नं. ८ का सदस्य विजय श्रेष्ठ, चन्द्रागिरि क्रिकेट एसोसियसनका अध्यक्ष प्रजिवन प्रधान, र क्लबका सल्लाहकार सरोज थापा लगायतले पुरस्कार वितरण गरेका थिए।