बुढानीलकण्ठमा दुई दिने सीप सम्मेलन तथा कृषि मेला–२०७९ भव्य रुपमा सम्पन्न भएको छ । स्थानीय उत्पादनलाई प्रदर्शन तथा प्रवर्द्धन गर्न नगरपालिकाले  आयोजना गरेको सो मेलामा रहेका ७१ वटा स्टलहरुमा हजारौले अबलोकन तथा कारोवार गरेका छन।

स्थानीय महिला समुह ,कृषि समुह ,घरेलु उद्योगहरुको सहभागितामा बुढानिलकण्ठ मन्दिर क्षेत्रमा आयोजना गरिएको सो मेलामा चैत्र ४ गते काठमाण्डौ महानगरपालिकाकी उपप्रमुख सुनिता डंगोल सहित विभिन्न क्षेत्रका व्यक्तित्वहरुले मेलाको अबलोकन गरेका थिए।

सो मेलामा  हातबाट बुनेका सामान, काठबाट बनाइएका, गाँजा र अल्लोबाट बनाइएका कपडा, जैविक खाने परिकार, विषादिरहित तरकारीलागायत सामानहरुको स्टल राखिएको थियो।

मेलाको उदघाटनमा  नगरप्र्रमुख मिठाराम अधिकारीले स्थानीय उत्पादन र घरेलु व्यवसायलाई बजारीकरण गर्न सीप सम्मेलन तथा कृषि मेला आयोजना गरिएको बताउदै सीप सम्मेलनले आगामी दिनमा व्यवसायलाई थप उत्प्रेरणा हुने विश्वास व्यक्त गरेका थिए ।

नगर उपप्रमुख अनिता लामाले नगरपालिकाभित्रका स्थानीय तथा घरेलु उत्पादन बजारीकरण गर्दै राष्ट्रिय अर्थतन्त्रमा जोड्न सीप सम्मेलन तथा कृषि मेला गरिएको जानकारी दिएकी थिइन्।

क्याटेगोरी : स्थानीय
ट्याग : #बुढानिलकण्ठ सिप सम्मेलन तथा कृषि मेला

---

---

---