कांग्रेससहितको विपक्षी गठबन्धनले आज दिल्लीमा बृहत् विरोध प्रदर्शन गर्दै

साझा पाना २०८३ असोज २६ गते ०८:३० मा प्रकाशित

काठमाडौं । भारतको प्रमुख विपक्षी दल कांग्रेससहितको विपक्षी दलहरुले मुख्य निर्वाचन आयुक्त ज्ञानेश कुमारको राजीनामा माग्दै मतदाता नामावलीको विशेष गहन पुनरीक्षण (एसआईआर) स्थगित गर्न माग गर्दै आज राजधानीमा बृहत् विरोध प्रदर्शन गर्दैछ ।

विपक्षी दल कांग्रेसका नेता राहुल गान्धीले दिल्ली आन्दोलनमा सहभागी हुन आह्वान गरेका छन् ।

उनले शनिबार दिल्लीमा युवाहरू शान्तिपूर्ण विरोध प्रदर्शनका लागि सडकमा उत्रिएकामा उनीहरूमाथि प्रहरी र भाजपाका गुण्डाहरू दुवैले कुटपिट गरेको दाबी गरेका छन् ।

आजको आन्दोलन सर्वोच्च अदालततर्फ हुने भन्दै उनले भनेका छन्, ‘देशका युवाहरू, सम्पूर्ण विपक्षी दलहरू, नागरिक समाज तथा लोकतन्त्रमा विश्वास गर्ने र भारतको संविधानको पक्षमा उभिने सबैजना हामीसँगै अघि बढ्नेछन् ।’

उनले भोट चोरीको अन्त्य, एसआईआर रोक्नुपर्ने, ज्ञानेश कुमारले राजीनामा दिनुपर्ने लगायतका माग प्रधानन्यायाधीशसमक्ष बुझाउने बताए ।

‘नरेन्द्र मोदी, अमित शाह, अजित डोभाल र मोहन भागवतले भारतको आवाज दबाउन सक्दैनन् । यी कायरहरूले हामीलाई तर्साउन सक्दैनन् । उनीहरू पछि हट्न बाध्य हुनेछन् ।’ गान्धीले फेसबुकमा लेखेका छन् ।

क्याटेगोरी : विशेष
ट्याग : #कांग्रेससहितको विपक्षी गठबन्धनले आज दिल्लीमा बृहत् विरोध प्रदर्शन गर्दै