ड्युटीका प्रहरी नै १३ लाखको जुवा खालमा : वरिष्ठ सईसहित १४ जना बाँकेमा पक्राउ

साझा पाना २०८२ असोज २४ गते ११:२३ मा प्रकाशित

दाङ । बाँके प्रहरीले वरिष्ठ सईसहित १४ जना जुवाडेलाई पक्राउ गरेको छ। पक्राउ परेकामध्ये वरिष्ठ सई शाही कर्णाली प्रदेश प्रहरी कार्यालयमा कार्यरत रहेका छन्। उनी बिदामा नभई ड्युटीमै रहेका बेला जुवाको खालबाट पक्राउ परेका हुन्।

बाँके प्रहरीका प्रवक्ता डिएसपी दीपक पातलीका अनुसार नेपालगन्जको बाइपास रोडस्थित मौरी रेष्टुरेन्टमा जुवा खेलिरहेको अवस्थामा उनीहरूलाई नियन्त्रणमा लिइएको हो।

पक्राउ पर्नेहरूमध्ये नेपालगन्ज–४ का पूर्व वडाध्यक्ष मोहम्मद सफिफ बेहना पनि छन्। साथै, विज्ञान श्रेष्ठ, गणेश बस्नेत, सेताज अन्सारी, ऋषि गुप्ता, तरूण गौतम, विनोद खड्का, संगम शाह, मधुसुदन दाहाल, मेघराज गौतम, भागिरथ यादव, नन्दलाल यादव र सुमन केसी पनि पक्राउ परेका छन्।

प्रहरीले उनीहरूको साथबाट रु. १३ लाख ६३ हजार ८ सय नगद र १० गड्डी तास बरामद गरेको जनाएको छ। पक्राउ परेकाहरूमाथि आवश्यक अनुसन्धान अघि बढाइएको प्रहरीले जनाएको छ।

क्याटेगोरी : विशेष
ट्याग : #ड्युटीका प्रहरी नै १३ लाखको जुवा खालमा