पारदर्शिता, संरचना र सहकार्यको बाटोमा बर्दिवास उद्योग वाणिज्य संघको तीन वर्षे यात्रा

साझा पाना २०८२ माघ ४ गते ०९:०४ मा प्रकाशित

साझापाना (काठमाडौँ) : ओमकार टेलिभिजनको लोकप्रिय कार्यक्रम ‘पञ्चामृत’ को ७३औँ अङ्कमा महोत्तरीको बर्दिबासमा रहेको बर्दिवास उद्योग वाणिज्य संघको पछिल्लो तीन वर्षे कार्यकालमाथि समग्र समीक्षा प्रस्तुत गरिएको छ । कार्यक्रमका सञ्चालक जीवनराज दाहालसँगको संवादमा संघका पदाधिकारी तथा स्थानीय व्यवसायीहरूले यस अवधिलाई संस्थागत सुधार र व्यावसायिक हकहितको जग बसाल्ने महत्वपूर्ण चरणका रूपमा मूल्याङ्कन गरेका छन् ।

संवादमा सहभागीहरूले विगतमा अस्तव्यस्त अवस्थामा रहेको संघलाई निश्चित ‘ट्रयाक’ मा ल्याउन यो कार्यसमिति सफल भएको बताएका छन् । विशेषतः संघलाई आधुनिक व्यवस्थापनतर्फ उन्मुख गराउँदै डिजिटलाइजेशनलाई प्राथमिकता दिइएको, सफ्टवेयरमार्फत व्यापारीहरूको तथ्याङ्क सङ्कलन सुरु गरिएको र यसले संस्थागत पारदर्शिता बढाएको दाबी गरिएको छ ।

यस कार्यकालमा कागजात व्यवस्थापनलाई व्यवस्थित बनाइनुका साथै कार्यसमितिले टिमवर्कको अभ्यास गर्दै सामूहिक निर्णय प्रणालीलाई बलियो बनाएको पदाधिकारीहरूको भनाइ छ । भौतिक पूर्वाधारतर्फ पनि उल्लेखनीय काम भएको बताउँदै संघको भवनलाई दुई तले बनाउने र आधुनिक फिनिसिङ सम्पन्न गरिएको जानकारी दिइएको छ ।

व्यवसायीहरूलाई आपत्‌कालीन अवस्थामा सहयोग पुर्‍याउने उद्देश्यले राहत कोष र अक्षय कोष स्थापना गरिएको छ । आगलागी, मृत्युजस्ता दुखद घटनामा तत्काल सहयोग पुर्‍याउन यी कोषहरू ‘मलम’को रूपमा काम गर्ने विश्वास संघले लिएको छ ।

व्यवसायीहरूको सेवा सहज बनाउन संघकै कार्यालयबाट आन्तरिक राजस्व कार्यालय तथा घरेलु कार्यालयका सेवा उपलब्ध गराउने वातावरण मिलाइएको छ । साथै, लेनदेन तथा आपसी झै–झगडाका विषय अदालतसम्म पुग्न नदिई संघभित्रै रहेको मेलमिलाप कक्ष मार्फत समाधान गर्ने अभ्यास सुरु गरिएको छ ।

बर्दिवासको दीर्घकालीन विकासलाई ध्यानमा राख्दै संघले १० वटा संघ–संस्थासँग सहकार्य गरी सम्भावित पर्यटन गन्तव्यहरूको पहिचान गर्दै तीनै तहका सरकारलाई विकासको ‘मार्गचित्र’ हस्तान्तरण गरेको छ । यसका साथै, बर्दिवास महोत्सव र सस्तो बजार जस्ता कार्यक्रमहरूले व्यवसायी र उपभोक्ताबीचको सम्बन्ध सुदृढ बनाउनुका साथै स्थानीय व्यापारलाई चलायमान बनाउन सहयोग पुर्‍याएको निष्कर्ष निकालिएको छ ।

यद्यपि, सकारात्मक उपलब्धिहरूका बाबजुद बर्दिवास क्षेत्रमा बढ्दो राजनीतिक प्रभाव, व्यवसायीहरूको विदेश पलायन र कमजोर आर्थिक अवस्था प्रमुख चुनौतीका रूपमा देखिएको छ । संवादमा सहभागी व्यवसायीहरूले हाल ८० देखि ९० प्रतिशत व्यापारीहरू घाटामा रहेको र आर्थिक अवस्था झन् जटिल बन्दै गएकोप्रति गम्भीर चिन्ता व्यक्त गरेका छन् ।

आगामी निर्वाचनलाई लक्षित गर्दै कार्यक्रममा बौद्धिक, इमानदार र व्यवसायीप्रति उत्तरदायी नेतृत्व चयन गर्नुपर्नेमा जोड दिइएको छ । शुल्क तिरिदिने वा क्षणिक प्रलोभनमा परेर मतदान नगर्न, आफ्नो विवेक प्रयोग गरी सक्षम प्रतिनिधि छनोट गर्न व्यवसायीहरूलाई आग्रह गरिएको छ ।

समग्रमा, वर्तमान कार्यसमितिले कोरेको ‘विकासको गोरेटो’ लाई निरन्तरता दिँदै अझ परिष्कृत र परिणाममुखी काम गर्न सक्ने नेतृत्व आवश्यक रहेको निष्कर्ष ‘पञ्चामृत’ कार्यक्रममार्फत प्रस्तुत गरिएको छ ।