प्रतिनिधिसभाको बैठकले विभिन्न ४ वटा विधेयक पारित

साझापाना २०७९ साउन ३१ गते १६:५८ मा प्रकाशित

काठमाडौँ । प्रतिनिधि सभाको आजको बैठकले विभिन्न ४ वटा विधेयक पारित गरेको छ ।

बैठकले सार्वजनिक ऋण व्यवस्थापन विधेयक, २०७९, पशु स्वास्थ्य तथा पशु सेवा परिषद् विधेयक, २०७९, स्टाण्डर्ड नाप र तौल (पाँचौँ संशोधन) विधेयक, २०७८ र प्रत्यायोजन विधेयक, २०७८ पारित गरेको हो ।

सार्वजनिक ऋण व्यवस्थापन विधेयक, २०७९ अर्थमन्त्री जनार्दन शर्मा र पशु स्वास्थ्य तथा पशु सेवा परिषद् विधेयक, २०७९ कृषि तथा पशुपक्षी विकास मन्त्री मृगेन्द्रकुमार सिंह यादवले पारितका लागि सभा समक्ष पेश गर्नुभएको थियो ।

यस्तै बैठकले राष्ट्रियसभाबाट सन्देशसहित प्राप्त स्टाण्डर्ड नाप र तौल (पाँचौँ संशोधन) विधेयक, २०७८ र प्रत्यायोजन विधेयक, २०७८ पनि बहुमतले पारित गरेको छ ।

उक्त विधेयक उद्योग, वाणिज्य तथा आपूर्ति मन्त्री दिलेन्द्रप्रसाद बडूले पारितका लागि सभा समक्ष पेश गर्नुभएको थियो ।

यसअघि बैठकमा सांसदहरुले समसामयिक विषयमा सरकारको ध्यानाकर्षण गराउनुभएको थियो ।

सांसद्हरुले अव्यवस्थित भूमिहीन बसोबासीको उचित व्यवस्थापन हुनुपर्ने, विकास निर्माणको काम प्रभावकारी रुपमा अगाडि बढाउनुपर्ने, प्रधानमन्त्री रोजगार कोषलाई प्रभावकारी बनाउनु पर्ने, काठमाडौँ उपत्यकाको फोहोरमैला व्यवस्थापन गर्नुपर्ने र दरबन्दी अनुसारका स्वास्थ्यकर्मीको व्यवस्था गरी ग्रामीण भेगमा स्वास्थ्य सेवाको पहुँच स्थापित गर्न सरकारको ध्यानाकर्षण गराउनुभयो ।

यस्तै सांसदहरुले नागरिकतामा दलितको नामलाई अपमानित गरिएको विषय निन्दनीय भएको भन्दै नाम सच्याउन चाहनेका लागि गृह मन्त्रालयले दिएको निर्देशन जिल्ला प्रशासन कार्यालयहरूले लागू गरि नसकेको बताउनुभयो ।

नागरिकता विधेयकलाई पुनर्विचारका लागि पुनः संसदमा नै आउनु राष्ट्रिय सहमतिका लागि मौका भएको बताउनुभयो ।

प्रतिनिधि सभाको अर्को बैठक भदौ २ गते बिहीबार बिहान ११ बजे बस्ने छ ।

क्याटेगोरी : राजनीति, समाचार
ट्याग : #प्रतिनिधिसभा, #प्रतिनिधिसभा बैठक