बागलुङ । बागलुङमा पछिल्लो तीन दिनयता आएको अविरल वर्षापछि गएको बाढीपहिरोमा परी मृत्यु हुनेको संख्या १२ पुगेको छ । विपद्मा परी एक जना अझै बेपत्ता छन् ।

जिल्लाका विभिन्न स्थानमा पहिरोले घर पुरिँदा मानवीय क्षति भएको हो । ताराखोला गाउँपालिका–५ सिपमा पहिरोले घर पुरिँदा दुई जनाको मृत्यु भएको जिल्ला प्रहरी कार्यालय बागलुङले जनाएको छ ।

जिल्ला प्रहरी कार्यालयका प्रहरी उपरीक्षक फणीन्द्र प्रसाईंका अनुसार पहिरोमा परी ५५ वर्षीय दिलबहादुर पुन र उनकी सासु, म्याग्दीको मालिका गाउँपालिका–२ की ७९ वर्षीय नरमाया रोकाको मृत्यु भएको हो । पहिरोमा परी पुनकी श्रीमती, दुई छोरा र बुहारी सामान्य घाइते भएका छन् ।

यसअघि शनिबार ताराखोला गाउँपालिकामै एक जनाको मृत्यु भएको थियो । आइतबार तमानखोला गाउँपालिकामा चार जनाको मृत्यु हुनुका साथै एक जना बेपत्ता भएका थिए । यस्तै, निसीखोला गाउँपालिकामा पाँच जनाको मृत्यु भएको थियो ।

लगातारको वर्षापछि आएको बाढीपहिरोका कारण जिल्लाका विभिन्न क्षेत्रमा जनधनको क्षति भएको छ । स्थानीय प्रशासन तथा सुरक्षा निकायले प्रभावित क्षेत्रमा उद्धार तथा खोजी कार्य जारी राखेका छन् ।

क्याटेगोरी : समाचार
ट्याग : #breaking, #बागलुङमा बाढीपहिरोमा परी मृत्यु हुनेको संख्या १२ पुग्यो

---

---

---