कार्यसम्पादन सम्झौतामा संखुवासभा जिल्ला प्रहरी कार्यालय सर्वोत्कृष्ट

साझा पाना २०८३ असोज ७ गते २०:२४ मा प्रकाशित

बिराटनगर । आर्थिक वर्ष २०८२/०८३ मा भएको वार्षिक कार्यसम्पादन सम्झौताको मूल्याङ्कनमा जिल्ला प्रहरी कार्यालय संखुवासभा कोशी प्रदेश अन्तर्गतका १४ जिल्ला प्रहरी कार्यालय मध्ये सर्वोत्कृष्ट भएको छ ।

कोशी प्रदेश प्रहरी प्रमुख प्रहरी नायब महानिरीक्षक (डीआईजी) शेखर खनाल र कोशी प्रदेश अन्तर्गतका १४ वटै जिल्ला प्रहरी प्रमुख तथा अन्य मातहत कार्यालयका प्रमुखबीच आर्थिक वर्ष २०८३/०८४ का लागि वार्षिक कार्यसम्पादन सम्झौतापत्रमा हस्ताक्षर सम्पन्न भएको छ ।

आर्थिक वर्ष २०८२/०८३ मा कोशी प्रदेश प्रहरी प्रमुख र १४ वटै जिल्ला प्रहरी प्रमुखबीच भएको वार्षिक कार्यसम्पादन सम्झौताअन्तर्गत जिल्ला प्रहरी कार्यालय संखुवासभाले निर्धारित लक्ष्यको ९४.३८ प्रतिशत हासिल गर्दै सर्वोत्कृष्ट जिल्ला प्रहरी कार्यालयको उपलब्धि हासिल गरेको हो ।
त्यसैगरी, नेपाल प्रहरी संगठन प्रमुख र कोशी प्रदेश प्रहरी प्रमुखबीच आर्थिक वर्ष २०८२/०८३ का लागि भएको वार्षिक कार्यसम्पादन सम्झौताको मूल्याङ्कनमा कोशी प्रदेश प्रहरी कार्यालय, विराटनगरले ८६.३६ प्रतिशत लक्ष्य हासिल गर्दै सर्वोत्कृष्ट प्रदेश प्रहरी कार्यालय बन्न सफल भएको जनाइएको छ ।

वार्षिक कार्यसम्पादन सम्झौतामार्फत प्रहरी कार्यालयहरूको कार्यसम्पादनलाई निर्धारित लक्ष्य, जिम्मेवारी तथा सूचकका आधारमा मूल्याङ्कन गर्ने गरिएको छ । कार्यसम्पादनमा प्राप्त उपलब्धिले सम्बन्धित प्रहरी कार्यालयको कार्यक्षमता, जिम्मेवारीप्रतिको प्रतिबद्धता तथा सेवा प्रवाहको अवस्थालाई समेत प्रतिबिम्बित गर्ने जनाइएको छ ।

आर्थिक वर्ष २०८३/०८४ का लागि भएको नयाँ कार्यसम्पादन सम्झौताले आगामी वर्ष प्रहरी सेवा, अपराध नियन्त्रण, शान्तिसुरक्षा तथा नागरिकमैत्री सेवा प्रवाहलाई थप प्रभावकारी बनाउने अपेक्षा गरिएको छ ।