काठमाडौं । नेकपा एमालेले पार्टीको निर्वाचन समीक्षा तथा आगामी संगठनात्मक पुनर्गठनका विषयलाई केन्द्रमा राख्दै लगातार तीन तहका बैठक आयोजना गर्ने भएको छ।

पार्टीले आइतबार कार्यदल र केन्द्रीय सचिवालयको बैठक बोलाएको छ। केन्द्रीय कार्यालय च्यासलमा बिहान ९ बजे कार्यदलको बैठक बस्नेछ भने दिउँसो १ बजे केन्द्रीय सचिवालयको बैठक आयोजना हुने एमालेले जनाएको छ।

यी दुवै बैठकबाट हुने छलफल तथा निर्णयलाई आगामी केन्द्रीय कमिटी बैठकमा प्रस्तुत गरिनेछ। एमालेको केन्द्रीय कमिटी बैठक असोज ५ देखि ७ गतेसम्म तीन दिन ललितपुरको भनिमण्डलस्थित रामबाग महलमा बस्ने तय भएको छ।

पछिल्लो समय एमालेभित्र पार्टीको निर्वाचन समीक्षा, संगठनात्मक पुनर्गठन तथा आगामी कार्यदिशाका विषयमा छलफल भइरहेको छ। यही प्रक्रियालाई अघि बढाउने क्रममा कार्यदल, केन्द्रीय सचिवालय र त्यसपछि केन्द्रीय कमिटी बैठक आयोजना गर्न लागिएको हो।

आइतबार बस्ने कार्यदल र सचिवालय बैठकले तय गर्ने एजेन्डा तथा निष्कर्षले असोज ५ गतेदेखि सुरु हुने केन्द्रीय कमिटी बैठकको छलफललाई आधार दिनेछ। केन्द्रीय कमिटी बैठकमा यसअघि भएका छलफल तथा निर्णयका साथै पार्टीको निर्वाचन समीक्षा र संगठनात्मक पुनर्गठनसम्बन्धी विषयमा थप विस्तृत छलफल हुने अपेक्षा गरिएको छ।

क्याटेगोरी : समाचार
ट्याग : #breaking, #एमालेमा निर्वाचन समीक्षा र पुनर्गठनबारे छलफल, #लगातार तीन तहका बैठक बस्दै

---

---

---