लायन्स क्लबद्वारा बाल कल्याण गृहलाई खाद्यान्न सहयोग

साझा पाना २०८३ भदौ ६ गते १९:५२ मा प्रकाशित

खाँदबारी । सामाजिक सेवामा सक्रिय लायन्स क्लब अफ खाँदबारी संखुवासभाले माट्स नेपालद्वारा सदरमुकाम खाँदबारीमा सञ्चालित बाल कल्याण गृहलाई खाद्यान्न सहयोग गरेको छ ।

क्लबले बाल कल्याण गृहलाई शनिबार १५० किलो चामल र १० किलो चिनी सहयोग गरेको हो । क्लबका अध्यक्ष विमल गौतमले उक्त खाद्यान्न सामग्री बाल कल्याण गृहका अध्यक्ष सुजन अधिकारीलाई हस्तान्तरण गर्नुभयो ।

बाल कल्याण गृहमा हाल बाबुआमा गुमाएका नौ जना बालबालिका आश्रय लिएर बस्दै आएका छन् । क्लबका अध्यक्ष गौतमले मनराम मोटर्सको सहकार्यमा खाद्यान्न सहयोग उपलब्ध गराइएको जानकारी दिनुभयो । उहाँले बालबालिकाको आधारभूत आवश्यकता पूरा गर्न सहयोग पुर्याउने उद्देश्यले मानवीय अभियान सञ्चालन गरिएको बताउनुभयो ।

अध्यक्ष गौतमले आगामी दिनमा पनि बाल कल्याण गृहलाई आवश्यक सहयोगलाई निरन्तरता दिने प्रतिबद्धता व्यक्त गर्नुभयो। उहाँले बालबालिकाका लागि आठ कोठे सुविधासम्पन्न भवन निर्माण गर्न समेत पहल भइरहेको जानकारी दिनुभयो ।

सहयोग ग्रहण गर्दै बाल कल्याण गृहका अध्यक्ष अधिकारीले बालबालिकाको दैनिक भोजन व्यवस्थापनमा खाद्यान्न सहयोगले ठूलो राहत पुगेको बताउनुभयो । उहाँले सहयोगका लागि लायन्स क्लब तथा सहकार्य गर्ने संस्थाप्रति आभार व्यक्त गर्नुभयो ।

लायन्स क्लब अफ संखुवासभाले शिक्षा, स्वास्थ्य, वातावरण संरक्षण तथा मानवीय सेवाका क्षेत्रमा विभिन्न सामाजिक अभियान सञ्चालन गर्दै आएको छ । क्लबले यस्ता सहयोगात्मक गतिविधिले समाजमा सहकार्य र मानवीय भावनालाई थप बलियो बनाउने विश्वास लिएको जनाएको छ ।