काठमाडौं । काठमाडौंको तारकेश्वर नगरपालिका–१ स्थित कालेबास चुनदेवी बालुवा प्रशोधन केन्द्रमा कारभित्र आत्मदाह गरेकी रश्मी रिजालको मृत्यु प्रकरणमा उनका परिवारले निष्पक्ष अनुसन्धान गरी दोषीमाथि कानुनी कारबाहीको माग गर्दै प्रहरीमा जाहेरी दिएका छन्।

जिल्ला प्रहरी परिसर काठमाडौंका प्रवक्ता एसपी पवन भट्टराईका अनुसार मृतकका पति श्रीराम खनालले ज्यानसम्बन्धी कसुरअन्तर्गत आवश्यक अनुसन्धान तथा दोषी पहिचान गरी कारबाही गर्न माग गर्दै जाहेरी दर्ता गराएका हुन्।

तारकेश्वर नगरपालिका–९ निवासी रिजाल सोही नगरपालिकाको वडा नं. १ स्थित कालेबास चुनदेवी बालुवा प्रशोधन केन्द्रमा पार्किङ गरिएको एमजी गाडीको पछाडिको भागमा मृत अवस्थामा फेला परेकी थिइन्। उनी नक्सालस्थित सानिमा क्यापिटल एण्ड मर्चेन्ट कम्पनीमा कम्प्लाइन्स अफिसर तथा प्रवक्ताका रूपमा कार्यरत थिइन्।

प्रहरीका अनुसार दर्ता भएको जाहेरीमा कुनै व्यक्तिको नाम किटान गरिएको छैन। एसपी भट्टराईले आत्मदाहको कारण पत्ता लगाई घटनामा कसैको संलग्नता भए कानुनी कारबाही गर्न माग गरिएको जानकारी दिए।

प्रारम्भिक अनुसन्धानका क्रममा परिवारले घटनामा पारिवारिक विवादको संकेत नरहेको बताएको प्रहरीले जनाएको छ। यस आधारमा कार्यालयसँग सम्बन्धित वा अन्य सम्भावित कारणबारे समेत अनुसन्धान केन्द्रित गरिएको छ।

अनुसन्धानमा संलग्न प्रहरीका अनुसार घटनास्थल वरपरका सीसीटीभी फुटेज, उपलब्ध भौतिक प्रमाण तथा घटना हुनुअघि केही दिनसम्म मृतक रिजालका गतिविधिको विस्तृत अध्ययन भइरहेको छ। प्रहरीले घटनाको सबै पक्षबाट अनुसन्धान जारी रहेको जनाएको छ।

क्याटेगोरी : समाचार
ट्याग : #hot, #कारभित्र आत्मदाह गरेकी रश्मी रिजाल प्रकरण

---

---

---