काठमाडौं । भारतमा जारी आन्दोलनको नेतृत्व गरिरहेका ककरोच जनता पार्टी (सीजेपी) का संस्थापक अभिजित दीपके अस्वस्थ भएका छन्। लगातारको आन्दोलन र व्यस्तताबीच उनी उच्च ज्वरो र शरीर दुख्ने समस्याबाट पीडित भएको बताएका हुन्।

दीपकेले सामाजिक सञ्जाल एक्समार्फत पछिल्ला केही दिनदेखि आफूलाई उच्च ज्वरो र शरीर दुख्ने समस्या देखिएको जानकारी दिएका छन्। उनले पेनकिलरको सहारामा काम गरिरहेको उल्लेख गर्दै स्वास्थ्य अवस्था कमजोर बनेपछि केही समय आराम गर्नुपर्ने अवस्था आएको बताएका छन्।

उनले जन्तर–मन्तरमा जारी आन्दोलनमा तत्काल उपस्थित हुन नसक्ने भन्दै समर्थकसँग क्षमा मागेका छन्। केही घण्टा विश्राम गरेपछि साँझसम्म आन्दोलनस्थलमा फर्किने योजना रहेको पनि उनको भनाई छ।

दीपके पछिल्लो एक महिनाभन्दा बढी समयदेखि जन्तर–मन्तरमा जारी आन्दोलनमा सक्रिय छन्। उनी सामाजिक अभियन्ता सोनम वाङचुकसँगै आन्दोलनको अग्रपंक्तिमा देखिँदै आएका थिए। वाङचुक स्वास्थ्य समस्याका कारण अस्पताल भर्ना भएपछि दीपकेले पनि आन्दोलनलाई निरन्तरता दिँदै अनशनमा सहभागिता जनाएका थिए।

भारतमा विभिन्न माग राखेर भइरहेको आन्दोलनका क्रममा दीपकेको स्वास्थ्य बिग्रिएको खबर सार्वजनिक भएपछि उनका समर्थकहरूले शीघ्र स्वास्थ्यलाभको कामना गरिरहेका छन्। यद्यपि उनले आन्दोलनबाट पछि नहट्ने र स्वास्थ्यमा केही सुधार आएलगत्तै पुनः आन्दोलनस्थलमा फर्किने प्रतिबद्धता जनाएका छन्।

क्याटेगोरी : समाचार
ट्याग : #भारतमा आन्दोलनरत ककरोच पार्टीका संस्थापक अभिजित दीपकेलाई के भयो ?

---

---

---