संखुवासभा । अविरल वर्षापछि आएको बाढी तथा पहिरोका कारण संखुवासभाको मकालु गाउँपालिका–५ फोक्टेस्थित पाखुरी खोलामा ठूलो क्षति भएको छ । बाढीमा परी स्थानीय कृषक दलबहादुर गुरुङका २ सय १८ भेडा बेपत्ता भएका छन् ।

जिल्ला प्रहरी कार्यालय संखुवासभाका अनुसार शनिबार बिहान करिब २ बजे आएको बाढीले गुरुङको चरन क्षेत्रमा रहेका २ सय ५० भेडामध्ये अधिकांश बगाएको हो । हालसम्म ३२ वटा भेडा मात्र जीवित अवस्थामा फेला परेका छन् ।

घटनाका क्रममा भेडा रेखदेखमा खटिएका कमल गुरुङ सकुशल रहेको प्रहरीले जनाएको छ । साथै झलक गुरुङको हातखुट्टामा सामान्य चोट लागेको र अवस्था सामान्य रहेको बताइएको छ ।
जिल्ला प्रहरी कार्यालयका प्रहरी नायब उपरीक्षक कुमारप्रसाद मैनालीका अनुसार बेपत्ता भेडाको खोजी कार्य जारी छ । घटना भएको जानकारी प्राप्त हुनासाथ प्रहरी चौकी नुमबाट प्रहरी सहायक निरीक्षक कमल श्रेष्ठको नेतृत्वमा टोली घटनास्थलतर्फ परिचालन गरिएको थियो ।

प्रहरीका अनुसार घटनास्थल प्रहरी चौकी नुमबाट करिब ४० किलोमिटर टाढा पर्दछ भने त्यहाँ पुग्न पैदल करिब १० घण्टा लाग्ने गर्दछ ।

लगातारको वर्षासँगै जिल्लाका उच्च पहाडी तथा हिमाली क्षेत्रमा बाढी पहिरोको जोखिम बढेकाले सतर्क रहन स्थानीयवासीलाई प्रशासनले आग्रह गरेको छ ।

क्याटेगोरी : विशेष, समाचार
ट्याग : #hot, #बाढी पहिरो, #मकालु गाउँपालिका, #संखुवासभा

---

---

---