काठमाडौं | टेक्सपायर कलेजले आशिष प्रसाईंलाई नयाँ प्रमुख कार्यकारी अधिकृत तथा प्राचार्यका रूपमा नियुक्त गरेको छ। नियुक्तिपछि विद्यार्थीहरूलाई सम्बोधन गर्दै उहाँले टेक्सपायर कलेज विद्यार्थीहरूको सम्भावना, महत्वाकांक्षा र भविष्य निर्माणप्रतिको प्रतिबद्धतामा विश्वास गर्ने शैक्षिक संस्था भएको बताउनुभएको छ।

प्रसाईंले विद्यार्थीहरूले टेक्सपायर कलेज छनोट गरेर सही निर्णय गरेको उल्लेख गर्दै कलेजले उनीहरूको शैक्षिक, व्यावसायिक तथा व्यक्तिगत विकासका लागि निरन्तर काम गर्ने प्रतिबद्धता व्यक्त गर्नुभएको छ। उहाँका अनुसार टेक्सपायरलाई आगामी दिनमा विद्यार्थीहरूले वास्तविक सीप, अवसर, सम्बन्ध र भविष्यको बलियो सुरुवात दिने कलेजका रूपमा सम्झिन सक्ने संस्थाका रूपमा विकास गर्ने लक्ष्य राखिएको छ।

यसै अवसरमा कलेजको नयाँ नेतृत्व संरचनाअन्तर्गत दुई जिम्मेवारीसमेत सार्वजनिक गरिएको छ। बिजय बाबु रेग्मीलाई टेक्सपायर कलेजको उप–प्राचार्यमा नियुक्त गरिएको छ। उहाँले बीएससी आईटी, एमबीए तथा सीप विकास कार्यक्रमसहित शैक्षिक विभागहरूको नेतृत्व गर्नुहुनेछ। विद्यार्थीहरूको शैक्षिक विषयसँग सम्बन्धित मुख्य सम्पर्क व्यक्तिका रूपमा पनि उहाँ रहने जनाइएको छ।

त्यसैगरी, ओमकार बस्नेतलाई उप–प्रमुख कार्यकारी अधिकृतका रूपमा नियुक्त गरिएको छ। उहाँले परीक्षा, विद्यार्थी सेवा तथा गुणस्तर सुनिश्चितता प्रणालीको जिम्मेवारी सम्हाल्नुहुनेछ। विद्यार्थीहरूको अनुभव सहज, निष्पक्ष र सहयोगी बनाउनेतर्फ उहाँको भूमिका महत्वपूर्ण रहने कलेजले जनाएको छ।

प्रमुख कार्यकारी अधिकृत तथा प्राचार्य प्रसाईंले विद्यार्थीहरूलाई नयाँ नेतृत्वसँग खुलेर सम्पर्क गर्न आग्रह गर्दै कलेज प्रशासन विद्यार्थीहरूको हितमा सधैं उपलब्ध रहने बताउनुभएको छ। उहाँले टेक्सपायर कलेजमा नयाँ सोच, जिम्मेवारी र विद्यार्थीकेन्द्रित दृष्टिकोणसहित विशेष शैक्षिक वातावरण निर्माण भइरहेको बताउँदै विद्यार्थीहरूसँगै अघि बढ्न पाउँदा आफू गौरवान्वित भएको धारणा व्यक्त गर्नुभएको छ।

क्याटेगोरी : banner, bannernews, education, ब्रेकिंग न्युज, विशेष, समाचार

---

---

---