रवि लामिछानेको मुद्दा फिर्ता प्रकरणमा सुनुवाइ जारी, आजै निर्णयको सम्भावना

साझा पाना २०८२ चैत्र १५ गते १५:१० मा प्रकाशित

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको मुद्दा संशोधन प्रकरणमा आइतबार सर्वोच्च अदालतमा सुनुवाइ जारी छ । न्यायाधीश विनोद शर्मा र अब्दुल अजीज मुसलमानको संयुक्त इजलासमा मुद्दाको सुनुवाइ भइरहेको हो ।

सुरुमा लामिछानेको बचाउमा निर्वतमान महान्यायाधिवक्ता रमनकुमार श्रेष्ठले बहस गरिरहेका छन् । श्रेष्ठको सकिएपछि रिट निवेदक पक्षबाट जवाफी बहस हुनेछ । जवाफी बहसपछि सम्भवतः आजै निर्णय गरिने सम्भावना छ ।

तत्कालीन महान्यायाधिवक्ता सविता भण्डारी बरालले लामिछानेविरुद्ध काठमाडौं, कास्की, पर्सा र रुपन्देही जिल्ला अदालतमा दर्ता गरिएको संगठित अपराध र सम्पत्ति शुद्धीकरण मुद्दा संशोधन गर्न जिल्ला सरकारी वकिल कार्यालयलाई निर्देशन दिएकी थिइन् । त्योसँगै कानुनी विवाद सुरु भएको थियो ।

भण्डारीको निर्णयविरुद्ध वरिष्ठ अधिवक्ता दिनेश त्रिपाठी, कानुनका विद्यार्थी आयुष बडाल र सिन्धुलीका युवराज पौडेल ‘सफल’ले रिट दायर गरेका थिए ।

गएको पुस ३० गते भण्डारीले लामिछानेमाथि सहकारी ठगीमा मात्र मुद्दा चलाउन सम्बद्ध जिल्ला सरकारी वकिल कार्यालयलाई पत्रमार्फत निर्देशन दिएकी थिइन् । निर्देशनमा संगठित अपराध र सम्पत्ति शुद्धीकरण मुद्दा संशोधनमार्फत फिर्ता लिन भनिएको थियो ।

क्याटेगोरी : समाचार
ट्याग : #आजै निर्णयको सम्भावना, #रवि लामिछानेको मुद्दा फिर्ता प्रकरणमा सुनुवाइ जारी