काठमाडौं । बालेन्द्र शाहको नेतृत्वमा सरकार बन्ने चर्चा चलिरहेका बेला टोखा क्षेत्रमा सुकुम्बासी बस्तीमा डोजर चलाइएपछि विवाद चर्किएको छ।

टोखास्थित बस्तीमा करिब १८ वटा टहरा भत्काइएको पीडितहरूले बताएका छन्। उनीहरूका अनुसार कुनै पूर्वसूचना नदिई एक्कासि आएको टोलीले ‘माथिको आदेश’ भन्दै घरहरू भत्काएको हो। स्थानीय जनप्रतिनिधि, विशेषगरी वडाध्यक्षलाई समेत जानकारी नदिई कारबाही गरिएको आरोप उनीहरूको छ।

“हामीलाई केही थाहा नै नदिई अचानक डोजर आयो, सामान निकाल्नसमेत पाएनौं,” एक पीडितले गुनासो गरे।

डोजर कारबाहीपछि बस्तीका सामग्री सडकभरि छरपस्ट भएका छन् भने बालबालिकासहितका परिवारहरू खुला आकाशमुनि बस्न बाध्य भएका छन्। “हाम्रो अवस्था अत्यन्तै दयनीय बनेको छ,” अर्का पीडितले बताए।

घटनापछि स्थानीय बासिन्दाले आफूहरूले समर्थन गरेको राजनीतिक शक्तिप्रति असन्तुष्टि जनाएका छन्। “हामीले विश्वास गरेर भोट हाल्यौं, तर उल्टै दुःख पाइयो,” उनीहरूको भनाइ छ। साथै, वडाध्यक्षले नै सुकुम्बासीबाट भाडा उठाएको आरोपसमेत स्थानीयले लगाएका छन्। स्रोतका अनुसार करिब दश रोपनी जग्गामा डोजर चलाइएको हो।

घटनास्थलमा प्रहरीको उपस्थिति रहे पनि पीडितहरूका अनुसार प्रहरीले कुनै हस्तक्षेप नगरी चुपचाप बसेको थियो। यसअघि पनि काठमाडौं महानगरपालिकाले विभिन्न स्थानमा सुकुम्बासी बस्ती हटाउँदा यस्तै विवाद हुँदै आएको छ।

यस घटनाले सुकुम्बासी व्यवस्थापन, मानवीय संवेदनशीलता र नगर प्रशासनको कार्यशैलीबारे पुनः गम्भीर प्रश्न उठाएको छ।

क्याटेगोरी : समाचार
ट्याग : #breaking, #टोखामा बालेनको सरकार नबन्दै डोजर आतङ्क

---

---

---