काठमाडौं, ८ फागुन  : नेपाली कांग्रेसका नेता तथा निवर्तमान ऊर्जा, जलस्रोत तथा सिँचाइ मन्त्री दीपक खड्काले सरकारलाई दमनको सट्टा संवादको बाटो अपनाउन आग्रह गर्नुभएको छ ।

आज जारी गर्नुभएको प्रेस विज्ञप्तिमा उहाँले पछिल्लो समय नागरिकका मौलिक हक तथा स्वतन्त्रतामा संकुचन ल्याउने प्रयास भएकोप्रति चिन्ता व्यक्त गर्नुभएको हो । संविधानले प्रत्याभूत गरेको विचार तथा अभिव्यक्तिको स्वतन्त्रता, सूचनाको हक र शान्तिपूर्ण असहमति जनाउने अधिकारलाई कुनै पनि बहानामा कमजोर पार्न नहुने उहाँको भनाइ छ ।

विज्ञप्तिमा सामाजिक अभियन्ता दुर्गा प्रसाईंको पटकपटकको पक्राउप्रति आपत्ति जनाउँदै उहाँले यस प्रकारका गतिविधि लोकतान्त्रिक मूल्य र संवैधानिक मर्मअनुकूल नहुने उल्लेख गर्नुभएको छ । संवैधानिक अधिकारको प्रयोग गर्दै सरकारका कामकारबाहीमाथि आवाज उठाउनु लोकतान्त्रिक अभ्यास भएको उहाँले बताउनुभएको छ ।

आगामी फागुन २१ गतेका लागि तय भएको निर्वाचनलाई स्वतन्त्र, निष्पक्ष र शान्तिपूर्ण वातावरणमा सम्पन्न गराउनु सरकारको दायित्व भएको उहाँले स्मरण गराउनुभएको छ । उम्मेदवारहरूले मतदातासँग स्वतन्त्र रूपमा भेटघाट तथा प्रचारप्रसार गर्न पाउने वातावरण सुनिश्चित गरिनुपर्ने उहाँको माग छ ।

उहाँले अभिव्यक्तिका आधारमा गरिएका गिरफ्तारी बन्द गर्न, थुनामा रहेकालाई रिहा गर्न, नागरिक अधिकार तथा विधिको शासनको सम्मान गर्न तथा मुलुकका समस्यालाई संवाद र सहमतिमार्फत समाधान गर्न सरकारसँग आग्रह गर्नुभएको छ ।

“दमन होइन, संवाद; डर होइन, विश्वास र अस्थिरता होइन, स्थिरता नै राष्ट्र निर्माणको मार्ग हो,”  नेता खड्काको विज्ञप्तिमा उल्लेख छ ।

क्याटेगोरी : समाचार
ट्याग : #दिपक खड्का, #दुर्गा प्रसाई रिहाई, #नेपाली कांग्रेस, #प्रेस बिज्ञप्ति, #संखुवासभा

---

---

---