गुल्मी । देशभर चुनावी चहलपहल बढिरहेका बेला गुल्मीको इस्मा गाउँपालिका–२, छल्दीटारी भने शोकमा डुबेको छ । आफ्नै बाबुले तीन महिनाको नवजात शिशुलाई भुइँमा पछारेर हत्या गरेको घटनाले सिंगो गाउँ स्तब्ध बनेको छ ।

गत बुधबार मादक पदार्थ सेवन गरी घर आएका ४६ वर्षीय सन्तबहादुर मुखियाले श्रीमतीसँग विवादका क्रममा काखमा रहेको तीन महिनाको छोरा सुवासलाई भुइँमा पछारेका थिए । घटनास्थलमै शिशुको मृत्यु भएको प्रहरीले जनाएको छ ।

घटनापछि हस्तीचौर प्रहरी चौकीको टोलीले सन्तबहादुरलाई नियन्त्रणमा लिई अनुसन्धान अगाडि बढाएको छ । जिल्ला प्रहरी कार्यालय गुल्मीका डीएसपी गंगाबहादुर सारुका अनुसार सन्तबहादुरले मादक पदार्थ सेवनको अवस्थामा आवेगमा आएर घटना गराएको बयान दिएका छन् । हाल उनी प्रहरी हिरासतमा छन् र मुद्दा अभियोजनको प्रक्रिया अघि बढाइएको छ ।

स्थानीयका अनुसार सन्तबहादुर लामो समयदेखि मदिरा सेवन गरी श्रीमती कमलामाथि शारीरिक तथा मानसिक हिंसा गर्दै आएका थिए । डेढ महिनाअघि कुटपिटकै क्रममा कमलाको खुट्टा भाँचिएको थियो । आर्थिक अवस्था कमजोर भएकाले उनको उपचार अस्पतालमा हुन सकेन, गाउँमै परम्परागत उपचार गर्न बाध्य भइन् ।

तीन महिनाकी सुत्केरी कमला भाँचिएको खुट्टाकै पीडामा घरधन्दा गरिरहेकी थिइन् । घटनाका दिन पनि सन्तबहादुर मदिरा सेवन गरी घर आएपछि सामान्य विवादले उग्र रूप लिएको र त्यसकै क्रममा शिशुको ज्यान गएको बताइएको छ ।

शिशुको मृत्युपछि कमला अचेत भएकी थिइन् भने जेठी छोरीले छिमेकीलाई खबर गरेकी थिइन् ।

हाल छल्दीटारी गाउँ शोकमा डुबेको छ । नवजात सन्तान गुमाएकी कमला विक्षिप्त अवस्थामा छिन् । पाँच सन्तानको पालनपोषण, कमजोर आर्थिक अवस्था र आफ्नै उपचारसमेत गर्न नसक्ने अवस्थाले उनको भविष्य झनै चुनौतीपूर्ण बनेको छ ।

क्याटेगोरी : समाचार
ट्याग : #breaking

---

---

---