पुस, काठमाडौँ । नेपाल विद्युत् प्राधिकरणले ओखरपौवा–तीनपिप्ले खण्डमा २२० केभी क्षमताको उच्च क्षमताको प्रसारण लाइन निर्माण गर्ने भएको छ । यसका लागि प्राधिकरणले प्रारम्भिक वातावरणीय परीक्षण (IEE) प्रतिवेदनको तयारी गरेको छ ।

प्राधिकरणको स्वामित्वमा रहेको त्रिशूली थ्री बी हब–मातातीर्थ प्रसारण लाइन आयोजनाको टावर नम्बर ३७ बाट ट्यापिङ गरी नयाँ प्रसारण लाइन निर्माण गरिनेछ । उक्त प्रसारण लाइन काठमाडौँको तारकेश्वर नगरपालिका अन्तर्गत पर्ने तीनपिप्लेमा जोडिनेछ, जहाँ प्राधिकरणले सबस्टेशन निर्माण गरिरहेको छ ।

प्रसारण लाइन धादिङको धुनीबेँसी नगरपालिका, नुवाकोटको ककनी गाउँपालिका हुँदै काठमाडौँको तारकेश्वरस्थित तीनपिप्लेसम्म निर्माण हुने जनाइएको छ ।

आयोजना कार्यान्वयनका क्रममा प्रभावित क्षेत्रको भौतिक तथा रासायनिक वातावरण, सामाजिक–आर्थिक अवस्था तथा सांस्कृतिक पक्षमा पर्ने सम्भावित प्रभावबारे अध्ययन भइरहेको प्राधिकरणले जनाएको छ । प्रारम्भिक अध्ययनपछि तयार गरिएको वातावरणीय परीक्षण प्रतिवेदनको मस्यौदालाई सरोकारवालाको सुझावका आधारमा थप परिमार्जन गरिनेछ ।

यस क्रममा आज धुनीबेँसी नगरपालिका–१ स्थित सिम्खडा गाउँमा सार्वजनिक सुनुवाइ कार्यक्रम आयोजना गरिएको छ । यसअघि सोमबार तारकेश्वर नगरपालिकाको कोट गाउँमा सार्वजनिक सुनुवाइ सम्पन्न भइसकेको प्राधिकरणले जनाएको छ ।

सार्वजनिक सुनुवाइका क्रममा उठाइएका सुझाव तथा विषयवस्तुलाई प्रारम्भिक वातावरणीय परीक्षण प्रतिवेदनमा समावेश गरिने प्राधिकरणले स्पष्ट पारेको छ ।

क्याटेगोरी : समाचार

---

---

---