नेपालगन्ज उपमहानगरपालिका ‘निषेधित क्षेत्र’ घोषणा

साझापाना २०७७ वैशाख २२ गते २०:५२ मा प्रकाशित

बाँके, २२ वैशाख ः बाँकेको नेपालगन्ज उपमहानगरपालिकालाई तीन दिनका लागि निषेधित क्षेत्र घोषणा गरिएको छ । प्रमुख जिल्ला अधिकारी कुमारबहादुर खड्काको अध्यक्षतामा आज बसेको सर्बदलिय सर्वपक्षिय बैठकले यस्तो निर्णय गरेको हो ।

बैठकले बैशाख २३ गते विहान ११ बजेदेखि २५ गते मध्यरातसम्मका लागि पूर्णरुपले निषेधित क्षेत्र कार्यान्वयन गर्ने निर्णय भएको प्रजिअ खड्काले बताए । त्यस्तै बैठकले सब्जी मण्डीलाई अर्को निर्णय नभएसम्मका लागि बन्द गर्ने निर्णयसमेत गरेको छ ।

बैठकले सुरक्षाकर्मी, स्वास्थ्यकर्मी, स्वाव संकलन गर्ने र कन्ट्रयाक्ट ट्रेसिङ्गका जनशक्तिबाहेक अन्यलाई आवागमनमा पूर्णरुपमा रोक लगाउने निर्णय गरेको छ । आफ्नो क्षेत्र सुरक्षित गर्ने बहानामा कुनैपनि किसिमले बाटो छेक्ने, राजमार्ग रोक्ने कार्य कोही कसैबाट गर्न नपाइने र त्यस प्रकारको कार्य गरेमा कानुनी कारवाहीसमेत गर्ने निर्णय गरेको छ ।

सामाजिक तथा धार्मिक सद्भावमा आँच आउने, खलल पर्ने सामाग्री प्रकाशन, प्रसारण र पोष्ट गर्ने व्यक्तिको पहिचान गरी तत्काल कानुनी दायरामा ल्याउने निर्णयसमेत बैठकले गरेको छ । नेपालगन्जमा शुक्रबार र आइतबार गरी १६ जनामा कोरोना संक्रमण देखिएपछि उपमहानगरपालिकालाई निषेधित क्षेत्र घोषणा गरिएको प्रजिअ खड्काको भनाई छ ।

क्याटेगोरी : ब्रेकिंग न्युज, विशेष, समाचार
ट्याग : #नेपालगन्ज