काठमाडौं । ‘जेनजी आन्दोलन’का क्रममा प्रहरीसँग वादविवाद गर्दै भाइरल बनेका एक युवकले आफ्नै आमाको हत्या गरेको घटना सार्वजनिक भएको छ।

धादिङको त्रिपुरासुन्दरी गाउँपालिका–५ थापाकटेरीका ३० वर्षीय यमबहादुर कँडेल जिरेले आइतबार राति धारिलो हतियार प्रयोग गरी आफ्नी ५५ वर्षीया आमा राममाया कँडेलको हत्या गरेको प्रहरी अनुसन्धानले पुष्टि गरेको छ।

जिल्ला प्रहरी कार्यालय धादिङका एसपी भेषराज रिजालका अनुसार घटनापछि प्रहरीले कँडेललाई प्रयोग गरिएको हतियारसहित नियन्त्रणमा लिएको छ। यो घटनापछि सिंगो गाउँ शोक र स्तब्धतामा डुबेको छ।

भदौ २३ र २४ गतेको जेनजी आन्दोलनका भिडिओहरूमा यमबहादुर कँडेल निकै भाइरल भएका थिए। उनले भिडिओमा ‘मेरो आँखामा डर छ? हेर्नुस् म डराएको छु? मलाई गोली हानेर मार्नुस्, म यो देश रोएको देख्न सक्दिन’ भन्ने संवाद बोलेका थिए, जसले उनलाई सामाजिक सञ्जालमा चर्चित बनाएको थियो।

क्याटेगोरी : समाचार
ट्याग : #breaking, #जेनजी आन्दोलनका भाइरल एक युवकले गरेआफ्नै आमाको हत्या

---

---

---