मुकुलको रिटमा सर्वोच्चले १७ असारमा रास्वपालाई छलफलमा बोलायो

साझापाना २०८२ असार १३ गते ११:१७ मा प्रकाशित

आफूलाई राष्ट्रिय स्वतन्त्र पार्टीको महामन्त्री पदमा फर्काउन माग गर्दै डा. मुकुल ढकालले दायर गरेको रिट निवेदन सुनुवाइ गर्दै सर्वोच्च अदालतले रास्वपासहितका विपक्षीहरुलाई छलफलमा बोलाएको छ ।

बिहीबार न्यायाधीश कुमार रेग्मीको एकल इजलासमा भएको बहसपछि १७ गते छलफलका लागि बोलाउने आदेश भएको हाे ।

रास्वपाले सहमहामन्त्री कवीन्द्र बुर्लाकोटीलाई महामन्त्री बनाएपछि उनले रास्वपाका सभापति रवि लामिछाने, महामन्त्री बुर्लाकोटी, प्रवक्ता मनीष झालगायतलाई विपक्षी बनाई बुधबार सर्वोच्चमा रिट दर्ता गराएका थिए ।

आफूलाई राष्ट्रिय स्वतन्त्र पार्टीको महामन्त्रीमा कायम राख्नुपर्ने माग गर्दै डा। ढकालले बुधबार सर्वोच्च अदालतमा रिट दायर गरेका थिए ।

ढकालले निर्वाचन आयोगमा आफू महामन्त्रीको रूपमा रहेको अभिलेखलाई यथावत राख्नुपर्ने अनि महामन्त्रीको रूपमा पार्टीमा काम गर्न पाउनुपर्ने माग गर्दै सर्वोच्च अदालतमा निवेदन दिएका थिए ।

रास्वपाले करिब एक वर्षअघि ढकाललाई पार्टी अनुशासनविपरीत अभद्र र अमर्यादित व्यवहार गरेको तथा पार्टीको छविमा आँच पुऱ्याएको भन्दै महामन्त्री, केन्द्रीय सदस्य र साधारण सदस्यबाट समेत निलम्बन गरेको थियो । ढकालले भने पार्टीको उक्त कारबाही अवैधानिक भएको जिकिर गर्दै आएका छन् ।

क्याटेगोरी : समाचार
ट्याग : #breaking, #डा. मुकुल ढकाल