धरानका मेयर हर्क साम्पाङले रोके प्रहरी चौकी निर्माणको काम

साझापाना २०८२ असार ९ गते १०:२२ मा प्रकाशित

विराटनगर । धरान उप महानगरपालिका मेयर हर्क साम्पाङले धरान १६ मा निर्माणाधीन प्रहरी चौकी निर्माणको काम रोक्न आदेश दिएका छन् ।

उनले भौतिक पूर्वाधार मन्त्रालय कोशी प्रदेश सरकारलाई पत्र लेख्दै चौकी निर्माणको काम रोकेका हुन् ।

धरानमा पछिल्लो समय विभिन्न वडामा प्रहरीका लागि भवनहरू बन्दै आएका छन् । धरान १६मा पनि बहुभाषिक पाठशाला रहेको छेउमा प्रहरी चौकी भवन बन्दै आएको छ ।

प्रदेश सरकारको बजेटमा निर्माणाधीन प्रहरी चौकीको भवन काम रोकिएको सुनसरीका प्रहरी प्रमुख एसपी सुमन तिम्सिनाले बताए ।

उनले भने, ‘धरानमा प्रहरीको आवश्यकतालाई हेरेर वडा कार्यालय र स्थानीयले चौकी भवनहरू बनाइदिँदै आएका छन् । धरान १६ मा पनि चौकी भवन बन्दै आएको थियो । अहिले मेयर साबले रोक्नु भएको छ ।’

उनले प्रहरीले चौकी भवन नबनाएकाले यो विषय आफूहरूसँग सम्बन्धित नरहेको बताए ।

चौकी निर्माणको ठेक्का पाएका व्यवसायी योगेश खतिवडाले चौकी निर्माणको काम रोकिएको बताए । उनले मेयर साबको आदेशका कारण निर्माणको काम रोकिएको बताए ।

धरानका मेयर हर्कराज साम्पाङले भौतिक पूर्वाधार मन्त्रालयमा लेखेको पत्रमा डीपीआर नहेरी डिजाइन बारे नगरपालिकासँग राम्रोसँग कुरा नगरी अथवा उपयुक्त स्थान नखोजी निर्माण कार्य नगरिदिनु हुन अनुरोध गरिएको छ ।

पत्रमा बहुभाषिक पाठशालाको कम्पाउन्ड भित्र प्रहरी चौकी बनाउँदा पाठशालाको उद्देश्य प्राप्तिमा असर पुग्ने उल्लेख छ ।