काठमाडौं । बहुचर्चित सुन प्रकरणकी प्रतिवादी अमला रोकालाई आज पनि अदालतमा पेश गरिँदै छ ।

फरार अवस्थामा शुक्रवार प्रहरीले टोखाबाट गिरफ्तार गरिएकी रोका आइतबार जिल्ला सरकारी वकिलको कार्यालयमार्फत जिल्ला अदालत, काठमाडौंमा पेश भएकी थिइन् । आइतबार जिल्ला न्यायाधीश बलराम लम्सालको इजलासमा थुनछेक बहस भयो । नसकिएपछि मुद्दालाई हेर्दाहेर्दैमा राखेर पुनः प्रहरी हिरासतमा पठाइएको थियो ।

प्रहरीको केन्द्रीय अनुसन्धान ब्युरो (सिआईबी) अन्तर्गत आर्थिक अपराध अनुसन्धान महाशाखाका प्रमुख एसएसपी होविन्द्र बोगटीका अनुसार आज कार्यालय समय शुरु हुनेबित्तिकै उनलाई जिल्ला अदालतमा उपस्थित गराइँदैछ । सम्भवतः आज उनलाई पुर्पक्षका लागि थुनामा राख्ने वा धरौटीमा रिहा गर्नेमध्ये एक आदेश आउने बोगटीले बताए ।

चलखेल तीव्र

सुनकाण्डमा मुछिएपछि रोकालाई अनुसन्धानको प्रारम्भिक चरणमै भगाउने र घटना भएको २३ महिनासम्म देशभित्रै ‘फरार’ अवस्थामा राख्ने गिरोह अहिले अदालतबाट धरौटीमा छुटाएर उन्मुक्ति दिलाउन सक्रिय छ ।

२०८० साउन २ गते त्रिभुवन अन्तर्राष्ट्रिय विमानस्थलको भन्सार जाँचबाट शंकास्पद सुन बाहिरिएपछि यो घटनाको पटाक्षेप भएको थियो । राजस्व अनुसन्धान विभाग र प्रहरीको केन्द्रीय अनुसन्धान ब्युरो (सिआईबी) ले गरेको अलग अलग अनुसन्धानबाट पनि अमलाको सक्रिय संलग्नता पुष्टि भएको थियो । अमलाका पति दावा छिरिङ सुन बरामद भएको १२ औँ दिनमा पक्राउ परेका थिए ।

यसबाहेक अवैध कल सेन्टरको सञ्चालनसहित चिनियाँ नागरिक संलग्न अन्य आपराधिक गतिविधिमा पनि दावा र अमलाको संलग्नता रहँदै आएको यो मुद्दाका एक अनुसन्धानकर्मी प्रहरीले बताए ।

घटनापूर्व रोका सञ्चालक रहेको ठमेलस्थित होटल भियनामा उच्च पदस्थ प्रहरी, प्रशासक, राजनीतिक व्यक्ति र पत्रकारको बाक्लो आवतजावत हुने गरेको प्रहरी अनुसन्धानबाट खुलेको थियो । ‘ती व्यक्ति किन त्यहीँ नै जान्थे र जानेमध्येकी व्यक्ति उनलाई भगाउनदेखि अहिले मुक्त गराउनसम्म किन सक्रिय छन् ?’, सुनकाण्डका एक अनुसन्धान अधिकृत यस्तो प्रश्न गर्छन् ।

जिल्ला अदालतस्रोतका अनुसार आइतबार थुनछेक बहस करिब करिब सकिएको थियो । न्यायाधीशले चाहँदा कार्यालय समयपछि पनि केही समय लिएर आदेश गर्न सक्थे । तर, उनलाई धरौटीमा छुटाउन सक्रिय गिरोहको चलखेल बढेसँगै न्यायाधीशहरू उक्त मुद्दामा आदेश गर्न हच्किएका थिए ।

क्याटेगोरी : समाचार
ट्याग : #breaking, #धरौटीमा छुटाउने गिरोह सक्रिय, #सुनकाण्डकी प्रतिवादी अमला रोकालाई अदालत लगिँदै

---

---

---