काठमाडौँ, असार ३ गते । पछिल्लो समय उत्पादन बढी हुँदा तरकारी सस्तो हुनुका साथै बिक्री गर्न समेत व्यापारीलाई हम्मेहम्मे पर्न थालेको छ ।

अन्य खेतीपाती गर्न छाडेर धेरैले तरकारी खेती गर्न थालेपछि उत्पादन बढी भएका कारण बजारमा ज्यादा तरकारी आएको व्यापारीहरुले बताए ।

कालीमाटी फलफूल तथा तरकारी बजारमा व्यापार गर्दै आउनुभएका चेतबहादुर थिङले तरकारी उत्पादन ज्यादा भएपछि तरकारीको मूल्य न्यून भएको र बेच्न नसक्ने अवस्था आएको बताउनुभयो ।

उहाँका अनुसार पहिले धान रोप्ने खेतमा अहिले धेरैले तरकारी लगाउन थालेपछि उत्पादन ज्यादा भएकाे छ । धादिङ, सर्लाही, काभ्रे, मकवानपुर लगायतबाट राजधानीमा तरकारी भित्रिने गरेको छ ।

खेतबारीको तरकारी सकिएपछि असार साउनबाट भाउ बढ्नसक्ने सम्भावना  छ । लौका १५–२० रुपियाँ, करेला २०–२५ रुपियाँ, बोडी १५–२० रुपियाँमा बेच्नुपरेको कुनै भाउ छैन । न व्यापारीलाई फाइदा न किसानलाई ।

तरकारी व्यापारी चेतबहादुर थिङले भन्नुभयो, ‘‘धान रोप्ने खेतमा अहिले तरकारी रोपाइँ धेरै भएकाले उत्पादन बढी भयो । अहिले इण्डियातिरको तरकारी छैन । धादिङ, सर्लाही, काभ्रे, मकवानपुरसहितका जिल्लाबाट तरकारी आउने गरेको छ । भारतीय तरकारी अहिले त्यति छैन । उत्पादन बढी भएरै तरकारी सस्तो भएको हो ।’’

व्यापारीहरुका अनुसार अहिले तरकारी नबिकेर कुहिएर फाल्नुपरेको छ । तरकारी नबिकेपछि आफूहरुलाई ठुलोमात्रामा घाटा लागिरहेको उनीहरुको भनाइ छ ।

कालीमाटीमा व्यापार गर्दै आउनुभएका अर्का व्यापारी विष्णु कार्कीले पनि उत्पादन बढी भएकै कारण तरकारीको भाउ सस्तो हुन पुगेको बताउनुभयो । उहाँले नेपाली तरकारीसँगै भारतीय समेत केही आएकाले बजारमा धेरै तरकारी भएको बताउनुभयो ।

उहाँले भन्नुभयो, ‘‘नेपालमा पनि उत्पादन बढी छ अहिले । बजार पनि धेरै भयो । व्यापारिक स्टलहरु पनि ठाउँठाउँमा भए । जहाँतहीँ स्टलहरु छन् । सस्तो भएपछि मान्छेले खान मन पराउँदैनन् । त्यही भएर होला तरकारी नबिकेको ।’’

देशको अवस्था ठिक नभएका कारण मान्छेको क्रयशक्ति कमजोर भएका कारण तरकारी विक्री नभएको कार्कीको बुझाइ छ ।

तरकारीसँगै फलफूलको मूल्यसमेत गत वर्षको भन्दा सस्तो रहेको कालीमाटीका व्यापारीहरुको भनाइ छ ।

कालीमाटी फलफूल तथा तरकारी विकास समितिले मङ्गलबारका लागि लोकल गोलभेंडा २९, ठुलो गोलभेंडा ९५, मकैबोडी ४६, मटरकोसा १५२, लौका १७, घिरौंला ३२, रायो साग ४२ र न्युरो प्रतिकिलो २८ रुपियाँ तोकेको छ भने कालीमाटी फलफूल तथा तरकारी बजारमा मङ्गलबार कुरिलो प्रतिकिलो तीन सय रुपियाँ तोकेको छ ।  त्यस्तै, कन्यच्याउको भाउ एक सय ४५ रुपियाँ तोकिएको छ ।

क्याटेगोरी : समाचार
ट्याग : #‘उत्पादन बढी हुँदा तरकारी सस्तो, #breaking, #किसानले मूल्य पाउनै छोडे’

---

---

---