छहरे-टोखा सडकमा सवारी चाप बढ्यो

साझापाना २०८२ जेठ १४ गते १३:०७ मा प्रकाशित

काठमाडौँ, जेठ १३ । काठमाडौं उपत्यकामा प्रवेश गर्ने मुख्य मार्ग त्रिभुवन राजपथको नागढुंगा–नौविसे खण्ड दिउँसो बन्द हुँदा छहरे–टोखा सडक खण्डमा सवारी चाप बढेको छ।

नागढुंगा-मुग्लिन सडक आयोजना जेठ १० देखि पिप्लामोड–नागढुंगा खण्डमा सडक स्तरोन्नतिको काम गर्दैछ र त्यसका लागि उक्त खण्ड अस्थायी रूपमा बन्द गरिएको छ।

सानातिना र मझौला सवारीसाधनहरूले वैकल्पिक मार्गका रूपमा सीतापाइला–रामकोट–धार्के सडक र सामाखुसी–टोखा–छहरे–त्रिशूली (विदुर) हुँदै गल्छी मार्ग प्रयोग गर्नुपर्ने सुझाव दिइएको छ।

यस कारण छहरे-टोखा सडक खण्डमा सवारी चाप उल्लेखनीय रुपमा बढेको छ।

सडक सुधारका कारण जेठ १० देखि २५ गतेसम्म बिहान १०:३० बजेदेखि दिउँसो ३ बजेसम्म सवारी आवागमन रोकिनेछ। तर आपतकालीन सेवाका लागि दमकल, एम्बुलेन्स र सुरक्षा निकायका सवारी साधनहरूलाई स्वतन्त्र आवागमनको अनुमति दिइनेछ।

क्याटेगोरी : समाचार
ट्याग : #छहरे-टोखा सडकमा सवारी चाप बढ्यो