हेटौंडा, मकवानपुर — मकवानपुरको थाहा नगरपालिका–३ स्थित गोपाली गाउँमा सोमबार बिहान भएको बस दुर्घटनामा दुई जनाको ज्यान गएको छ भने दुई जना गम्भीर घाइते भएका छन्।

मकवानपुर प्रहरीले दिएको जानकारीअनुसार त्रिभुवन राजपथको गोपाली गाउँबाट थानाबजारतर्फ जाँदै गरेको बा ३ ख ५९९० नम्बरको बसब्रेक फेल भएर अनियन्त्रित भई थाहा नगरपालिकाका उपमेयर भरत गोपालीको घरभित्र पसेको थियो।

दुर्घटनामा परेर ४० वर्षीय कृष्ण बलामी र लोकेन्द्र कुमार ठाकुरको ज्यान गएको पुष्टि गरिएको छ। स्थानीयका अनुसार बसले सडकमा हिँडिरहेका एक पुरुषलाई ठक्कर दिएर घरभित्र छिरेको थियो।

यस घटनामा रघुनन्द यादव र कमलेश कुमार साह गम्भीर घाइते भएको प्रहरीले जनाएको छ। उनीहरूको उपचारका लागि अस्पतालमा भर्ना गरिएको छ।

प्रहरीले घटनाको थप अनुसन्धान भइरहेको जानकारी दिएको छ।

क्याटेगोरी : समाचार
ट्याग : #breaking, #उपमेयरको घरमा ब्रेक फेल बस पसेर

---

---

---