काठमाडौं — नेकपा एमालेले जेठ १५ गते गणतन्त्र दिवसको अवसरमा काठमाडौंमा भव्य जनप्रदर्शनको तयारी गरिरहेको छ। यसै सन्दर्भमा पार्टी मुख्यालय च्यासलमा एमालेनिकट जनसंगठनका पदाधिकारीहरूको बैठक जारी छ। बैठकमा प्रदर्शनमा अधिकतम सहभागिता सुनिश्चित गर्न रणनीति निर्माण र जिम्मेवारी बाँडफाँटबारे छलफल भइरहेको बताइएको छ।

गणतन्त्र दिवसलाई ‘काउन्टर’ प्रदर्शन

हिजो बसेको पार्टी सचिवालय बैठकले गणतन्त्र दिवसलाई देशभर उत्सवका रूपमा मनाउने निर्णय गरेको थियो। राजावादी धारको चुलिंदो गतिविधिलाई ध्यानमा राख्दै एमालेले त्यसको ‘काउन्टर’स्वरूप काठमाडौंमा शक्ति प्रदर्शन गर्ने तयारी थालेको हो। यसैअनुसार पार्टी नेतृत्वले जनसंगठनहरूलाई परिचालन गरिरहेको छ।

वरिष्ठ नेताहरूको सहभागिता

च्यासलमा जारी बैठकमा महासचिव शंकर पोखरेल, उपमहासचिव विष्णु रिमाल, सचिव लेखराज भट्ट, योगेश भट्टराई, पद्मा अर्याललगायतका शीर्ष नेताहरू उपस्थित छन्। उनीहरूले प्रदर्शनको स्वरूप, सहभागी संख्याको व्यवस्थापन, रुट निर्धारण, प्रचारप्रसार लगायत विषयमा छलफल गरिरहेका छन्।

ओलीको निर्देशन

प्रधानमन्त्री एवं एमाले अध्यक्ष केपी शर्मा ओलीले पार्टी कार्यकर्तालाई जेठ १५ गते बिहान ११ बजेदेखि अपरान्ह २ बजेसम्म काठमाडौंलाई ‘नियन्त्रणमा’ लिन निर्देशन दिएका छन्। उनले जनसहभागितामार्फत राजावादी आन्दोलनलाई निष्क्रिय पार्ने रणनीति अघि सारेका छन्।

नागरिकमा अपिल

एमालेले गणतन्त्र दिवसको उत्सवमा सक्रिय नागरिक सहभागिता सुनिश्चित गर्न आमनागरिकलाई पनि अपिल गरेको छ। पार्टीले गणतन्त्रको रक्षा र संस्थागत विकासका लागि जनशक्ति परिचालन गर्न सबै तहका जनवर्गीय संगठनहरूलाई आह्वान गरेको छ।

क्याटेगोरी : समाचार
ट्याग : #hot, #जेठ १५ मा भव्य प्रदर्शन हुने

---

---

---