काठमाडौं । राजसंस्था पुन:स्थापनाका लागि गठित संयुक्त जनआन्दोलन समितिका कार्यवाहक अध्यक्ष डा. जगमान गुरुङले आफू कसैले उचालेर उचालिने र पछारेर पछारिने मान्छे नभएको बताएका छन् । आफूलाई पूर्वराष्ट्रपति विद्यादेवी भण्डारीले राजा उचाल्न पठाएको भन्ने अभिव्यक्ति देखेको भन्दै उनले सो टिप्पणी गरेका हुन् ।

 

फेसबुकमा स्टाटस लेख्दै गुरुङले आफ्नो नाम र फोटो राखेर वैशाख २२ गते श्री ५ ज्ञानेन्द्रको राज्याभिषेक गर्न सूचना पनि गलत भएको बताए ।

उनी लेख्छन्, ‘उत्ताउलो कुकुर सम्साँझै भुक्छ भनेजस्तै म त्यस्तो उत्ताउलो काम कुरा गर्ने मान्छे होइन । त्यसकारण मैले त्यस प्रकारको आह्वान गरेको पनि छैन । परिआएको खण्डमा म स्वयंले श्रव्यदृश्य माध्यमबाट आह्वान गर्नेछु ।’

 

आफूहरूमा उत्ताउलो र उत्तेजितपन हुनु नहुने गुरुङले बताएका छन् ।

‘धीर उदात्तभाव र सत्कर्ममा नै हाम्रो भविष्य र सफलता निहीत छ । त्यसकारण मेरो नामबाट यस्ता अनर्गल र सस्तो लोकप्रियताका लागि प्रचार प्रसार नगर्न सबैलाई अनुरोध गर्दछु । त्यस्तो अनर्गल प्रचार प्रसारको पछि नलाग्न पनि सबैलाई सचेत गराउँद छु ।’

गुरुङले एक व्यक्तिले आफूलाई पूर्वराष्ट्रप्रति भण्डारीसँग जोडेर टिप्पणी गरेको फेसबुकमा देखेपछि यो प्रष्टीकरण लेखेको बताए । भण्डारीसित आफ्नो कुनै पनि व्यक्तिगत सम्वन्ध नरहेको उनको भनाइ छ ।

‘एकपटक राष्ट्रपति हुँदा उहाँले ज्ञानमणि नेपाल, महेशराज पन्त, भेषनारायण दाहाल र मलाई धर्म-संस्कृतिको विषयमा मन्थन गर्न बोलाउनुभएको थियो । म त्यसमा गएको थिएँ । त्योभन्दा बाहेक उहाँसित मेरो कुनै पनि सम्वन्ध र सम्पर्क भएको छैन,’ गुरुङले भने, ‘अहिले एमालेकै व्यक्तिहरूले नचाहिँदो दुष्प्रचार गरिराखेका रहेछन् ।’

क्याटेगोरी : समाचार
ट्याग : #breaking, #डा. जगमान गुरुङ भन्छन्- म कसैले उचालेर उचालिने र पछारेर पछारिने मान्छे होइन

---

---

---