बालाजु गेष्ट हाउस सञ्चालक बालिकालाई जबरजस्ती वेश्यावृत्तिमा लगाएको अभियोगमा पक्राउ

साझापाना २०८१ चैत्र २१ गते १३:४८ मा प्रकाशित

काठमाडौं, ६ चैत । प्रहरीले काठमाडौंको बालाजुबाट एक गेष्ट हाउस एण्ड रेष्टुरेन्ट सञ्चालकलाई पक्राउ गरेको छ । बालिकालाई जबरजस्ती वेश्यावृत्तीको काममा लगाएको अभियोगमा प्रहरीले गरेको छ ।

मानव बेचबिखन अनुसन्धान व्यूरोबाट खटिएको प्रहरी टोलीले काठमाडौं महानगरपालिका-१६ बालाजुमा पञ्चेश्वर महाकाली गेष्ट हाउस एण्ड रेष्टुरेन्टका सञ्चालकलाई मंगलबार बेलुका पक्राउ गरेर आज सार्वजनिक गरेको हो ।

उक्त गेष्ट हाउसका सञ्चालक गोरखा पालुङटार नगरपालिका-६ घर भएका ४५ वर्षीय शम्भु लाल मल्ललाई पक्राउ गरिएको व्युरोको सूचना अधिकारी प्रहरी उपरीक्षक (एसपी) नरेन्द्र कुँवरले केटिएम दैनिकलाई बताए ।

मल्लले आर्थिक लाभ/फाइदा लिई बालिकाहरुलाई जबरजस्ती वेश्यावृत्तिमा लगाउने गरेको भन्ने गोप्य सूचनाको आधारमा त्यहाँ पुगेको प्रहरीले उक्त गेष्टहाउसबाट २ जना बालिकाहरुको उद्दार गरेको छ ।

उद्दार गरिएका बालिकाहरूलाई सुरक्षित आवासको लागि सेल्टरहोममा पठाईएको व्युरोले जारी गरेको विज्ञप्तीमा उल्लेख छ ।

पक्राउ परेका मल्ललाई मानव बेचविखन तथा ओसारपसार मुद्दामा काठमाडौं जिल्ला अदालतबाट चैत ४ गतेबाट लागूहुने गरी पहिलोपटक पाँच दिनको म्याद थप गरेर अनुसन्धान गरिरहेको एसपी कुँवरले बताए ।

क्याटेगोरी : समाचार
ट्याग : #बालाजु गेष्ट हाउस सञ्चालक बालिकालाई जबरजस्ती वेश्यावृत्तिमा लगाएको अभियोगमा पक्राउ