चैत १५ गतेको विरोधसभामा सहभागी हुन समाजवादी मोर्चाको आह्वान, यी स्थानबाट निकालिँदैछ जुलुस

साझापाना २०८१ चैत्र १३ गते ०९:१६ मा प्रकाशित

काठमाडौं । समाजवादी मोर्चाले चैत १५ गते काठमाडौंमा गर्ने प्रदर्शनलाई व्यवस्थित बनाउनेबारे छलफल गरेको छ । नेकपा एसको केन्द्रीय कार्यालय आलोकनगरमा बसेको मोर्चाको बैठकले हजारौंको संख्यामा काठमाडौंमा प्रदर्शन गर्ने तयारी भएको नेकपाका प्रवक्ता खड्गबहादुर विश्वकर्माले बताए ।

उनले हजारौंको संख्यामा उपस्थित गराउने अनुमान गरेपछि लाख डेढ लाखसम्म हुनसक्ने विश्लेषण सुनाए । उनका अनुसार जुलुस कोटेश्वर हुँदै माइतीघर मण्डला, कुपन्डोल, कालीमाटी, नागपोखरी पुतलीसडक, केही सुन्धारा, भृकुटीमण्डपको माथिल्लो चोकमा पुगेर सभामा परिणत हुने बताए ।

उनले भने, ‘यो भव्य विरोध प्रदर्शन हो । चारैतिरबाट जनताको उपस्थित र सहभागिता रहन्छ । जनताको धेरै ठूलो त्याग र बलिदानबाट यो व्यवस्था ल्याएको हो । त्यसैले सबैले आत्मसमीक्षा गर्दै गणतन्त्रलाई बलियो बनाउनुपर्छ भन्ने हो । फेरि देशलाई उल्टो बाटोमा फर्काउने कुरा राष्ट्रघाती हुन्छ । यो स्वीकार्य हुँदैन ।’

उनले १५ गतेको कार्यक्रममा सहभागी हुन सबै कम्युनिष्ट, वामपन्थीहरुलाई आह्वान गरे । उनले रावावादीहरुको बढ्दो सक्रियतामा विदेशी शक्तिहरुको आशक्ति देखिएको आशंका गरे ।

क्याटेगोरी : समाचार
ट्याग : #breaking, #चैत १५ गतेको विरोधसभामा सहभागी हुन समाजवादी मोर्चाको आह्वान, #यी स्थानबाट निकालिँदैछ जुलुस