प्रहरीको सरुवा मापदण्ड संशोधन गरिँदै- यी ८ विषयमा मागियो सुझाव

साझापाना २०८१ चैत्र १२ गते १६:१९ मा प्रकाशित

काठमाडौं । नेपाल प्रहरीले आफ्ना कर्मचारीको सरुवासम्बन्धी मापदण्डलाई परिमार्जन तथा संशोधन गर्ने भएको छ ।

नयाँ संगठन प्रमुख (आईजी) मा दिपक थापाले कार्यभार सम्हालेलगत्तै प्रधान कार्यालयस्थित कर्मचारी प्रशासन शाखाले यसलाई अगाडि बढाएको हो ।

कर्मचारी प्रशासन शाखाले मातहतका युनिटलाई चैत १२ को मितिमा पत्राचार गरी प्रहरी कर्मचारीको सरुवासम्बन्धी मापदण्ड २०७९ लाई परिमार्जन र संशोधन गर्न सुझाव मागेको छ । मापदण्डलाई थप प्रभावकारी बनाउन के-कस्ता प्रावधान थप गर्न उपयुक्त हुन्छ भनी सुझाव माग गरिएको हो ।

पत्रमा सोधिएको छ, ‘विद्यमान सरुवा मापदण्डमा उल्लेख भएका कुन कुन बुँदाहरू संशोधन गर्दा प्रहरी कर्मचारीको सरुवा प्रणाली अझ व्यवस्थित र विश्वसनीय हुन्छ ?’

उक्त पत्रअनुसारको सुझाव दिनका लागि चैत १५ सम्मको समयसीमा तोकिएको छ ।

माग गरिएको सुझावअन्तर्गत प्रहरी नायव महानिरीक्षक (डीआईजी) देखि प्रहरी निरीक्षक (इन्स्पेक्टर) दर्जामा कार्यालय प्रमुख हुने श्रेणीगत दरबन्दी वर्गीकरणसहित ८ बुँदा उल्लेख छन् ।

प्रहरीको सरुवा र पदस्थापनमा राजनीतिक नेतृत्व हावी हुँदा संगठनका नीति तथा योजना कार्यान्वयनमा समस्या रहदै आएको छ । संगठनका आन्तरिक प्रक्रिया र विषयहरुको समाधान संगठनद्वारा तय गरिने नीतिमा आधारित हुनुपर्ने मान्यतामा आधारित भएर यस्तो गरिएको प्रहरी स्रोतले जनाएको छ ।

सरुवा मापदण्डविपरीत विगतमा जिल्ला पठाइएका एसपीहरु पठाइएलगत्तै फिर्ता भएका थिए । एक जिल्लामा कार्यालय प्रमुख भएका कतिपय एसपी त्यसलगत्तै अर्को जिल्लामा कार्यालय प्रमुखकै रूपमा खटाइदा मापदण्डमाथि प्रश्न उठ्दै आएको थियो ।

प्रहरी परिचालनलाई व्यवस्थित र प्रभावकारी बनाउन उक्त पत्राचार भएको केन्द्रीय प्रहरी प्रवक्ता डीआईजी दिनेश आचार्यले बताए ।

क्याटेगोरी : समाचार
ट्याग : #प्रहरीको सरुवा मापदण्ड संशोधन गरिँदै- यी ८ विषयमा मागियो सुझाव