टोखा–बुढानिलकण्ठ विष्णुमती करिडोर सडकको ट्रयाक खोल्ने कार्य सुरु

साझापाना २०८१ फागुन १२ गते १८:१९ मा प्रकाशित

टोखा नगरपालिकाले टोखा प्रहरी चौकीदेखि बुढानिलकण्ठ सिमाना जोड्ने विष्णुमती करिडोर सडकको ट्रयाक खोल्ने कार्य सुरु गरेको छ।

नगर प्रमुख प्रकाश अधिकारीको नेतृत्वमा उपप्रमुख मुरारी तामाङ, प्रमुख प्रशासकीय अधिकृत शेरबहादुर बिसी, वडा अध्यक्षलगायतका जनप्रतिनिधि, नेपाल प्रहरी, नगर प्रहरी तथा स्थानीयवासीको उपस्थितिमा ट्रयाक खोल्ने कार्य अगाडि बढाइएको हो। पहिलो चरणमा विष्णुमती खोलाको दायाँतर्फ तीनवटा डोजर प्रयोग गरी सडक निर्माण कार्य थालिएको छ। नगर प्रमुख अधिकारीका अनुसार आगामी दिनमा शुभ होम्स कम्पाउण्डबाट आपसी समझदारीमा बाँयातर्फको ट्रयाक पनि खोलिनेछ।

यस्तै, टोखा नगरपालिकाले मनोहरतिर्थ धामदेखि ग्राण्डी टावरसम्मको विष्णुमती करिडोर क्षेत्रलाई कालोपत्रे र पक्की सडक निर्माण गर्ने कार्य अघि बढाइसकेको छ। प्रमुख प्रशासकीय अधिकृत बिसीका अनुसार करिडोर क्षेत्रमा सार्वजनिक जग्गामा हरियाली पार्क निर्माण गर्ने योजना रहेको छ। टोखा वडा नं. ९ र ११ मा यसै वर्षभित्र पार्क निर्माणका लागि टेण्डर प्रक्रिया अघि बढ्ने उनले जानकारी दिए।

टोखा नगरपालिकाले लाइफलाइन सडक निर्माणका लागि विष्णुमती करिडोर सडकको विकासलाई प्राथमिकता दिँदै आएको छ। करिडोर क्षेत्रमा रहेका अव्यवस्थित घर/टहरा हटाई जग्गाको व्यवस्थापन गर्दै सडक विस्तार भइरहेको छ। नयाँ बसपार्कदेखि विष्णुमती करिडोर हुँदै बुढानिलकण्ठ पुग्ने छोटो तथा सहज मार्गको रूपमा यस सडकलाई विकास गरिनेछ।

क्याटेगोरी : समाचार
ट्याग : #breaking, #टोखा–बुढानिलकण्ठ विष्णुमती करिडोर सडकको ट्रयाक खोल्ने कार्य सुरु