आज कार्यालय खुलेलगत्तै रुपन्देही अदालतमा पुग्ने तयारीमा रवि लामिछाने

साझापाना २०८१ माघ ९ गते ०९:५१ मा प्रकाशित

रुपन्देही । रास्वपाका सभापति एवम् पूर्वगृहमन्त्री रवि लामिछाने आज कार्यालय खुले लगत्तै जिल्ला अदालत रुपन्देहीमा उपस्थित हुने भएका छन् ।

उनीविरुद्ध सुप्रिम ऋण तथा बचत सहकारी संस्थाको रकम ठगी र संगठित अपराधको कसुरमा आइतबार अदालतमा १० करोड ९९ लाख बिगोसहितको मुद्दा दायर भएको थियो । सोही मुद्दाको प्रतिवादका लागि लामिछाने हिजो साँझ भैरहवा आएका हुन् ।

लामिछाने बुधवार अदालत उपस्थित हुनका लागि मङ्गलवार जहाजमार्फत भैरहवा आइपुगेको रास्वपा सहकोषाध्यक्ष दीपक बोहराले जनाएका छन् । लामिछाने मङ्गलवार दिउँसो साढे ४ बजे भैरहवा विमानस्थलमा उत्रिएका थिए । लामिछानेले आफ्ना तर्फबाट सकेसम्म कम वकिल राखेर एक दुई दिनमै बहस सिध्याउने योजनामा छन् ।

अहिले लामिछानेको पक्षमा बहस गर्नका लागि कानुन व्यवसायी नारायणदत्त कँडेल भैरहवामा आइसकेको छामिछानेको सचिवालय हेरेका अविनाश आचार्यले जनाए ।

‘मौसमका कारण अन्य कानुन व्यवसायी आइसक्नु भएको छैन, पहिले बयान हुने भएकाले र सरकारी वकिलले गर्ने भएकाले आजै सबै कानुन व्यवसायी नआउनुभएको हो, बहस कति जनाले गर्ने भन्ने तोकिएको छैन । पहिलेकै टीममा रहेका कानुन व्यवसायीले नै गर्नुहुन्छ, यहाँ पनि धेरै कानुन व्यवसायी रहनुभएको छ तर सकेसम्म थोरैको संख्यामा बहस गराउने हुन्छ होला’ उनले भने ।

रुपन्देही जिल्ला अदालतका सूचना अधिकारी अनन्तराज मरासिनीले अदालतमा हाजिरी भएपछि उपलब्ध न्यायाधीशमध्येबाट कसको इजलासमा जाने निधो हुने बताए ।

क्याटेगोरी : समाचार
ट्याग : #breaking, #आज कार्यालय खुलेलगत्तै रुपन्देही अदालतमा पुग्ने तयारीमा रवि लामिछाने