दोस्रो “तीनपोखरी कप” आमन्त्रित पुरुष फुटबल प्रतियोगितामा एपीएफ कोशीको विजयी सुरुआत

साझापाना २०८१ पुस २७ गते ०८:५६ मा प्रकाशित

तीनपोखरी कप आमन्त्रित पुरुष फुटबल प्रतियोगितामा एपीएफ कोशीको विजयी सुरुआत

खाँदबारी, २७ पुस । संखुवासभाको सदरमुकाम खाँदबारीमा शुक्रबार देखि सुरु भएको दोस्रो ‘तीनपोखरी कप’ आमन्त्रित पुरुष फुटबल प्रतियोगितामा एपीएफ कोशी प्रदेशले विजयी सुरुआत गरेको छ ।

गत वर्षको विजेता एपीएफ कोशी प्रदेशले मकालु फ्रेन्डस क्लब खाँदबारीलाई टाईब्रेकरमा ५–४ गोल अन्तरले हराउँदै सेमिफाइनलमा आफ्नो स्थान सुरक्षीत गरेको हो । निर्धारित समयमा दुबै टिमले गोल गर्न नसकेपछि टाईब्रेकरमा एपीएफ विजयी भएको छ ।

शुक्रबार नै भएको अर्को खेलमा खाँदबारी युथ क्लबलाई तीनपोखरी समाज विकास क्लबले १–० गोल अन्तरमा पराजित गरेको छ । तीनपोखरीका लागि मिक्सेन लिम्बुले पहिलो हाफको ३ मिनेटमा गोल गरेका थिए ।

तीनपोखरी समाज विकास क्लबको आयोजनामा खाँदबारी रंगशालामा सुरु भएको प्रतियोगितामा एपीएफ, भौसाबारी मोरङ, चुलाचुली झापासहित कोशी प्रदेशका आठ टिम सहभागी छन् । प्रतियोगिताको विजेताले ट्रफीसहित नगद दुई लाख २५ हजार रुपैयाँ प्राप्त गर्ने छ । उपविजेताले नगद एक लाख १० हजार र सेमिफाइनलिस्ट दुई टिमले नगद २५/२५ हजार रुपैयाँ प्राप्त गर्ने छन् ।

—