तारकेश्वरमा एक महिनादेखि प्रमुख प्रशासकिय अधिकृत नहुँदा जनताका आधारभूत काम ठप्प , भुक्तानी, ठेक्का सम्झौतादेखि बिषयगत शाखाका कर्मचारी टिक्नैसकेनन

साझापाना २०८१ पुस २४ गते १०:२१ मा प्रकाशित

तारकेश्वर काठमाडौं । आर्थिक वर्षको मध्यावधि अर्थात् पुस मसान्त सकिँदै गर्दा मङ्सिर २३ गतेदेखि तारकेश्वर नगरपालिकामा प्रमुख प्रशासकिय अधिकृत नहुँदा मुख्य कामहरु नै अलपत्र परेको छ ।
पुस मसान्त सकिँदै गर्दा हिउँदे नगर अधिवेशन नगरसभा गर्नुपर्ने संघारमा आइपुग्दा नगरपालिकामा नगरसभाका सचिव समेत हुने तथा प्रमुख प्रशासकिय अधिकृत छैनन् । एक कर्मचारीले हामीलाई नाम नबताउने शर्तमा भनेका छन् – हाकिमको सरुवा पनि भएको छैन, दिनेश सर आउनु पनि भएको छैन । कार्यलयमा गएर हेर्दा ढोकामा नाम भएको बोर्ड झुण्डाइएको छ, तर बाहिर लेखेर कोठामा ताला लगाइएको छ । दैनिक कामकाज र कार्यालय प्रमुखबाट सम्पादन गराउनुपर्ने तथा उहाँकै तोकादेशका आधारमा सम्पादन गर्नुपर्ने कतिपय कामहरु गर्न पाएका छैनौं । यसले गर्दा हामी शाखालाई समेत धेरै अप्ठ्यारो परिरहेको छ । नगरसभामा स्वीकृत वार्षिक कार्यक्रमहरु चौमासिक रुपमा लक्ष्य नै लिएर सम्पादन गर्न अगाडि बढाउनुपर्नेमा आर्थिक अधिकार प्राप्त कर्मचारी नहुँदा समयमा सम्पन्न गर्न गार्‍हो भएको बताए ।ति कर्मचारी भन्छन् – नयाँ हाकिम आउने कुराको पनि अत्तोपत्तो नै छैन्, कार्यालयका धेरै कामहरु रोकिएका छन् । कार्यालय प्रमुख नहुँदा अफिस नै सुनसान जस्तै छ ।

तारकेश्वर नगरपालिकामा पुराना कार्य सम्पन्न भएका योजना तथा कार्यक्रमको अन्तिम भुक्तानीहरु समेत हुन नसकेकोमा निर्माण व्यवसायी र उपभोक्ता समितिले फरकपत्र डटकमसँग बताएका छन् ।

गत २०८१ असार १० मा सम्पन्न १५ औं नगरसभाबाट स्वीकृत भएको तारकेश्वर नगरपालिकाको बजेट, नीति तथा कार्यक्रमको किताव ६ महिना सकिदै गर्दा यही पौष महिनामा प्रकाशनमा आएर वडा वडामा योजनाहरु सम्झौताका लागि पुगेता पनि यसभन्दा अगाडि नै सम्पन्न भईसकेको कामको त भुक्तानी नआएको एक वडाअध्यक्षले हामीसँग दुखेसो पोखेका छन् । आर्थिक वर्ष सुरुवातको ६ महिनाको समय भनेको विकास निर्माणको हिसाबले एकदमै पिक आवर हो । जुन समयमा धेरै कामहरु सम्पन्न गरीसक्नुपर्ने तथा थालनी गर्नुपर्ने हुन्छ ।

नगरपालिकामा विभिन्न शाखाका कर्मचारीहरु काम गर्ने वातावरण नभएपछि सरुवा लिएर अन्यत्र गएका छन् भने कोही काममा अनावश्यक टर्चरका कारण स्वेच्छिक अवकाश भन्दै अवकाशमा बसेका छन ।

यसरी संघीयता कार्यान्वयन पछि जनताको घरदैलोमा स्थानीय सरकारको रुपमा सम्पूर्ण अधिकार सहित आएको देशकै राजधानी काठमाडौको तारकेश्वर नगरपालिकामा एक महिनादेखि कार्यालय प्रमुख विहिन हुनुले सुशासन र जनताको सेवा प्रवाहमा चुस्तता ल्याउनमा थप अन्योलता देखिएको छ ।

क्याटेगोरी : समाचार
ट्याग : #hot, #तारकेश्वरमा एक महिनादेखि प्रमुख प्रशासकिय अधिकृत