नानपामा लैंगिक हिंसा विरुद्धको १६ दिने अभियान कार्यक्रम सम्पन्न

साझापाना २०८१ मंसीर २० गते १३:३३ मा प्रकाशित

२० मंसिर, काठमाडौं । हामी सबैको प्रतिबद्धताः लैंगिक हिंसा अन्त्यका लागि ऐक्यवद्धता’ भन्ने राष्ट्रिय नाराका साथ नागार्जुन नगरपालिकाले ३३औँ अन्तर्राष्ट्रिय लैंगिक हिंसा विरुद्धको १६ दिने अभियान कार्यक्रम मनाएको छ । अभियान सुरुआतमा आज बिहान प्रभातफेरी आयोजना गरिएको थियो । लैङ्गिक हिंसाविरुद्धको १६ दिने अभियानका अवसरमा आयोजना गरिएको प्रभातफेरी पछि बोल्दै नागार्जुन नगरपालिकका प्रमुख मोहन बहादुर बस्नेतले कसै माथि लैंगिक हिंसा भएमा वडा अथवा नगरको महिला सञ्जालमा सम्पर्क गर्न आग्रह गर्नुभयो ।

त्यस्तै नगरपालिकका उपप्रमुख सुशिला अधिकारीले लैंगिक हिंसा महिला माथि मात्र हुने हिंसा नभइ पुरुष तथा अन्य माथि हुने हिंसा रहेको प्रस्ट पार्दै पहिले यसलाई आफै बाट अन्त्य गर्नुै पर्नैमा जोड दिनुभयो ।
नगरपालिकाका प्रमुख प्रशासकिय अधिकृत शिव प्रसाद रिजालले सबै खाले हिंसा अन्त्यका लागि यो अभियानलाई सार्थक बनाउन अपिल गर्नुभयो ।
लिङ्गको आधारमा हुने सबैखाले हिंसा अन्त्यका लागि उक्त अभियान हरेक बर्ष सञ्चालन हुँदै आएको छ । हरेक वर्ष नोभेम्बर २५ देखि डिसेम्बर १० सम्म लैङ्गिक हिंसाविरुद्धको १६ दिने अभियान सञ्चालन गरिन्छ ।