नाति पुस्तालाई परम्परागत बाजा सिकाइँदै

साझापाना २०८१ भदौ ७ गते १४:०४ मा प्रकाशित

भदौं ७ गते । बाँकेको खजुरा गाउँपालिका –४ एफगाउँका खेमबहादुर विक ११ बर्षको हुनुभयो । गाउँघरमा हुने विवाह पूजा, धार्मिक कार्यक्रम र अन्य कार्यक्रममा उहाँ आफ्ना हजुरबुवा तिलबहादुरसँगै बाजा बजाउन जानुहुन्छ ।

एफगाउँस्थित जनकल्याण माविमा कक्षा ६ मा अध्ययनरत खेम विद्यालय बन्द भएको दिनमा गाउँघरमा हुने विभिन्न कार्यक्रममा बाजा बजाउने गर्नुभएको छ । यसैगरी एफगाउँकै धनसिंह परियार बर्षौदेखि बाजा दमाह बजाउँदै आउनुभएको छ ।

पछिल्लो केही बर्षदेखि उहाँका नाति सुनिल परियार पनि उहाँको साथमा देखिनुहुन्छ । जनकल्याण माविमै कक्षा ७ मा अध्ययनरत सुनिल विद्यालय विदा भएको दिनमा हजुरबुवाको साथमा बाजा बजाउँदै कार्यक्रममा सहभागी हुने गरेको बताउनुभयो ।

हजुरबुवाहरुले बाजा बजाउँदा रमाइलो लागेर आफुहरु पनि विद्यालय बन्द भएको दिनमा सँगसँगै हिड्ने गरेको सुनिलको भनाइ छ । सुनिल भन्नुहुन्छ, ‘सुरुमा रमाइलोको लागि बाजा बजाउन थालेका थियौं, अहिले विद्यालय नभएको दिनमा अभिभावकले खोजेर ल्याउनुहुन्छ ।’

नाति पुस्तालाई दमाह र अन्य बाजा बजाउन सिकाइरहेका ज्येष्ठ नागरिक नाति पुस्तालाई भए पनि परम्परागत बाजाको पुस्तान्तरणका लागि योगदान गर्न सकेकोमा उत्साहित छन् ।

खजुरा गाउँपालिकाका अध्यक्ष डम्बरबहादुर विकले गाउँपालिकाले परम्परागत कला, सँस्कृतिको संरक्षणका लागि बार्षिक बजेट बिनियोजन गरिरहेको बताउनुभयो । खजुरा गाउँपालिकाको ‘ई’ गाउँ, धौलागिरी, सितापुरलगायतका स्थानमा ज्येष्ठ नागरिकले परम्परागत सँस्कृतिलाई नयाँ पुस्तामाझ सिकाइरहेका छन् ।

क्याटेगोरी : समाचार
ट्याग : #नाति पुस्तालाई परम्परागत बाजा सिकाइँदै