उपसभामुख रानाविरुद्ध संसद्‌को राज्य व्यवस्था समितिमा उजुरी

साझापाना २०८१ साउन ५ गते ११:०९ मा प्रकाशित

काठमाडौं, ५ साउन । उपसभामुख इन्दिरा राना मगरविरुद्ध संसद्को राज्य व्यवस्था तथा सुशासन समितिमा उजुरी परेको छ ।

उपसभामुख रानाले पदको दुरुपयोग गरी काठमाडौंस्थित अमेरिकी राजदूतावासमा गैरसंसद् व्यक्तिलाई भिसा सिफारिस गरेको भन्दै भक्तपुरका अर्जुन बास्कोटाले राज्य व्यवस्था समितिमा उजुरी दिनुभएको हो ।

उजुरीमा उपसभामुखमाथि छानबिन गरी जिम्मेवारीबाट हटाउनसमेत माग गरिएको छ । समितिका सभापति रामहरि खतिवडाले उपसभामुखविरुद्ध उजुरी परेको जानकारी दिँदै यसबारेमा सभामुख देवराज घिमिरेलाई जानकारी गरेको बताउनुभयो ।

उहाँले उपसभामुख रानासमेत उपस्थित भएको संसद्‌को कार्य व्यवस्था परामर्श समितिमा यसबारे सभामुखसँग छलफल गरेको उल्लेख गर्नुभयो ।

उपसभामुख रानाले पदको दुरुपयोग गरेर पाँच जनालाई अमेरिकामा लग्ने गरी पत्र लेखेको सार्वजनिक भएपछि उहाँ विवादमा पर्नुभएको छ ।

संयुक्त राष्ट्र संघको संयन्त्र कमिसन अन द स्टाटस अफ वुमेनको ६७औं सत्र २०७९ साल फागुन २२ देखि चैत ३ गतेसम्म अमेरिकाको न्यूयोर्कमा भएको कार्यक्रममा भाग लिन जान लाग्नुभएको उपसभामुखले महिला अधिकारको अभियानसँग असम्बन्धित ४ पुरुष र एक महिलालाई भिसाको अन्तर्वार्ता मिति छिटो दिन काठमाडौंस्थित अमेरिकी दूतावासलाई पत्र लेख्नुभएको थियो ।

यो विषय राष्ट्रिय स्वतन्त्र पार्टीको शीर्ष नेतृत्वले गत वैशाखमै थाहा पाएर पनि सामसुम पारिएको खुलासा भएको छ ।

क्याटेगोरी : समाचार
ट्याग : #breaking, #उपसभामुख रानाविरुद्ध संसद्‌को राज्य व्यवस्था समितिमा उजुरी