स्याङ्जा, जेठ ३० गते । ज्येष्ठ नागरिकलाई प्राथमिकतामा राखी जिल्ला प्रशासन कार्यालय स्याङ्जा र इलाका प्रशासन कार्यालय वालिङ्ले राष्ट्रिय परिचयपत्र सम्बन्धी सेवा प्रवाह गर्न थालेको छ ।

सरकारले सामाजिक सुरक्षा भत्ता वितरणमा राष्ट्रिय परिचयपत्रलाई प्रयोगमा ल्याएपछि कार्यतालिका बनाएर जेठ २७ गतेबाट सेवा प्रवाह गर्न थालेको हो ।

सहायक प्रमुख जिल्ला अधिकारी दीपक पौडेलले प्रशासन कार्यालयमा बढ्न गएको चापले सेवा लिन कठिनाई उत्पन्न भएपछि राष्ट्रिय परिचयपत्र आवेदन तथा वितरण कार्यलाई छिटोछरितो र प्रभावकारी बनाउनका लागि हप्ताका विभिन्न बारहरुमा प्रत्येक पालिकाका ज्येष्ठ नागरिकलाई प्राथमिकतामा राखी सेवा प्रवाह गर्ने व्यवस्था मिलाइएको बताउनुभयो ।

सेवाअन्तर्गत जिल्ला प्रशासन कार्यालय स्याङ्जाले आइतबार आँधीखोला गाउँपालिका, सोमबार फेदिखोला गाउँपालिका, मङ्गलबार पुतलीबजार नगरपालिका, बुधबार अर्जुनचौपारी गाउँपालिका, बिहीबार हरिनास गाउँपालिका र शुक्रबार बिरुवा गाउँपालिकाका ज्येष्ठ नागरिकलाई प्राथमिकतामा राखी सेवा प्रवाह गरेको पौडेलले बताउनुभयो ।

यस्तै इलाका प्रशासन कार्यालय वालिङ्ले आइतबार र शुक्रबार वालिङ् नगरपालिका, सोमबार भीरकोट नगरपालिका, मङ्गलबार गल्याङ नगरपालिका, बुधबार चापाकोट नगरपालिका र बिहीबार कालीगण्डकी गाउँपालिकाका सेवा दिन थालेको छ ।

ज्येष्ठ नागरिकको हकमा सोही अनुसारको आवश्यक सूचना प्रवाह गरि सहयोग गरिदिन जिल्ला स्थित सबै स्थानीय तहलाई अनुरोध समते गरेको पौडेलले बताउनुभयो ।

क्याटेगोरी : समाचार
ट्याग : #hot, #कार्यतालिका बनाएर प्रशासनको सेवा

---

---

---